首頁 即時娛樂

【頭條獨家】享受拍戲被打 譚耀文《逃獄兄弟》挑戰父女情

05/03/2021 08:00:00
譚耀文喺新片《逃獄兄弟》中都有好大發揮,唔止同張建聲對打,飾演老婆伍詠薇及囡囡陳漢娜跟他有好多互動情節。
譚耀文喺新片《逃獄兄弟》中都有好大發揮,唔止同張建聲對打,飾演老婆伍詠薇及囡囡陳漢娜跟他有好多互動情節。

譚耀文(阿譚)喺新片《逃獄兄弟》中飾演有情有義,受尊重嘅前江湖大佬「滾筒哥」,片中他打得唔算多,但依然好有挑戰性:「惟一有場阿譚同張建聲肉搏戲,兩人喺碌架牀度撞來撞去,拳腳碰撞擦傷難免,我反而最怕聽到碌架牀移位時發出嘅刺耳聲響,聽到耳都痺晒!另外,爬通道逃獄時畀鐵片刮傷、着住對監犯鞋喺操場勁跑刮到雙腳起水泡等。外邊人見我成日拍打戲,有時打到變豬頭,以為我好可憐,其實我好享受,因為太愛演戲。」至於另一條主線講父女情,指他講喺獄中好掛住個女,所以一見到伍詠薇及陳漢娜母女嚟探監就喊:「現實中都我都係爸爸,所以好有感受,今次我會將20幾年演戲經驗一次過開倉。」

拍《葉問3》被泰臣對打驚足十世
阿譚拍咗10幾年打戲有一定經驗、心得及技巧,他坦承最怕同欠缺經驗嘅新人對打,所以今次同栢天男交手都會特別緊張,幸而對方表現鎮定,唔算驚驚青青,咁樣合作起嚟會安心啲:「咁耐以嚟我畀人打傷多不勝數,有啲都記得,但唔點名講,費事以為我記仇。做新人時都試過打傷人。而一生人最驚最驚,甚至驚足十世,最危險一次係拍《葉問3》畀泰臣打,大家知泰臣喺擂台上打到對方入晒『廠』,甚至咬甩耳仔,不過佢好清楚只係拍戲,而經驗話我聽,愈識打嘅人,拍戲會愈小心。」

《龍在邊緣》向古仔開槍痛心疾首
另外,之前他同古天樂拍《龍在邊緣》都好傷:「當時劇情講我見到古天樂走過,以為對方喺我前面,就向鏡中嘅古天樂開槍,因為樓底好矮,冇諗到六分厚玻璃會被開槍聲音震碎,爆玻璃搞到我塊面花晒,簡直係痛心疾首,好彩玻璃冇入眼,而醫院又喺附近,最後極速去醫院洗傷口。好記得嗰晚仲要做梅艷芳2001年演唱會嘉賓,載歌載舞演唱《烈燄紅唇》,因為拍戲同唱歌兩樣都係我鍾意做嘅嘢,就算負傷仍堅持去演出,呢件事令我一生難忘。」

片中阿譚有場同張建聲肉搏戲。
片中阿譚有場同張建聲肉搏戲。
首次同伍姑娘合作做兩公婆,好有新鮮感。
首次同伍姑娘合作做兩公婆,好有新鮮感。

片中同栢天男冇乜打戲,但劇情講阿譚被栢天男嘔到一身都係。
片中同栢天男冇乜打戲,但劇情講阿譚被栢天男嘔到一身都係。
阿譚隔住木板同栢天男玩「心口碎大石」。
阿譚隔住木板同栢天男玩「心口碎大石」。

譚耀文,張繼聰,張建聲,栢天男等,着住對監犯鞋喺操場勁跑、打籃球刮雙腳起水泡。
譚耀文,張繼聰,張建聲,栢天男等,着住對監犯鞋喺操場勁跑、打籃球刮雙腳起水泡。
之前阿譚同古天樂拍《龍在邊緣》都受過傷。
之前阿譚同古天樂拍《龍在邊緣》都受過傷。
阿譚以前經常跟師傅梅艷芳周圍演出。
阿譚以前經常跟師傅梅艷芳周圍演出。
其他文章
hd