首頁 即時娛樂

【頭條獨家】壓力爆煲 花姐勸睇心理醫生 AK失控噴涙:唔想認自己有病

14/04/2021 00:49:00
AK坦承入行以來,不斷給自己壓力,令情緒出現問題。
AK坦承入行以來,不斷給自己壓力,令情緒出現問題。

做藝人難,做偶像更難!18年憑《全民造星》出道爆紅的MIRROR,短短兩年多萬千寵愛的同時,亦承受非一般壓力。成員Anson Kong(江𤒹生)去年開始出solo歌,雖然成績不俗,但最終年尾頒奬禮未能奪得恨攞多時的《叱咤》生力軍獎,失望之下木無表情的AK,被外界指黑面冇風度狂插。早前他推出新歌《黑之呼吸》接受《頭條》訪問,重提事件突然壓力爆煲流下男兒淚,他承認怕家人擔心而情緒低落,試過鎖自己在廁所幾個鐘,花姐曾勸他睇心理醫生,但他不想承認自己有病,亦想專心應付演唱會等排山倒海工作。不過他承諾會以健康的Anson走落好,希望可以快啲見番活潑開朗的AK啦!撰文:杜淑霞 攝影:譚壹致 造型:PIPA Creative 髮型:Denny [email protected] Private i salon 化妝:Rainbow [email protected] makeup centre 服裝:Maison Margiela 、Giuseppe Zanott 場地:VS MEDIA

訪問當日AK甫開始已不似平日活潑,大部份時間更是講到眼濕濕,睇見都令人心痛。
訪問當日AK甫開始已不似平日活潑,大部份時間更是講到眼濕濕,睇見都令人心痛。
講到第一年上夢想的叱咤舞台,令AK忍不住喊出來。
講到第一年上夢想的叱咤舞台,令AK忍不住喊出來。



AK坦承創作新歌《黑之呼吸》,確實跟叱咤頒奬禮當晚事件有關,「嗰日我有做得唔好地方,我冇去首先恭喜我隊友,太過沉醉喺自己個黑色世界入面,呢個係我需要改善嘅地方,《黑之呼吸》有講到呢件事,如何去處理自己嘅情緒,就係唔好傷害到別人先,我覺得我冇傷害到兩個兄弟,反而我傷害咗自己啫!呢個係我喺呢個頒獎禮上咗好大嘅一課,對我點樣面對自己情緒。」



提到對《叱咤》的情意結,AK竟然講到喊,「我哋11月出道,隔咗兩個月開演唱會跟住上《叱咤》,我好記得去完《叱咤》會有個會章同埋場刊,我哋第一次去只係喺個台度行出嚟,唔叫參與過,但大家好開心,自己都有份,我仲好記得返到屋企落妝未沖涼,坐喺廁所望住個章望咗10幾分鐘,終於去到啦!(喊)等咗咁多年終於去到,嗰陣時好開心。」原來AK並非單為個人榮譽,他眼濕濕話:「我好想為屋企人攞一次獎,覺得上年係最有機會,比起《全民造星》好似更加大機會,對自己期望好大,當冇嘅時候失落會好大,我嗰陣時個腦淨係諗住阿爸阿媽,我冇因為嗰啲輿論唔開心,反而去反省自己,內心好想為屋企人攞啲honour,原來我嗰日做嘅反應,反而傷害到我嘅屋企人,因為我啲屋企人會好擔心我。」

AK坦承《黑之呼吸》是頒獎禮後有感而發之作。
AK坦承《黑之呼吸》是頒獎禮後有感而發之作。
AK未能奪得《叱咤》生力軍獎,失望下木無表情,被外界指黑面冇風度狂插。
AK未能奪得《叱咤》生力軍獎,失望下木無表情,被外界指黑面冇風度狂插。



唔識消化情緒


AK認為新人奬一世人只得一次,對獎項的渴望和野心,一直是他進步的原動力,因自知天份不及其他人,更承認過程給了自己不少壓力,「做得未夠好,點樣可以做得再好啲,一路形成呢種壓力,內心有呢啲情緒,唔知道點樣消化,特別入行後,呢一行忽然間唔係好容許藝人有情緒抒發,(眼濕濕)藝人就應該係廿四小時都positive,好攰㗎喎!藝人都會有收工時候,我哋出個post,打嘅嘢唔開心少少又會影響到好多人,開始會慢慢收埋自己情緒,有啲唔好嘅情緒都唔敢同人講,唔敢同屋企人講,最down嘅時候開始負面,又知道自己唔可以咁樣喎!開始搵其他嘢去做,瘋狂咁樣練嘢,但練嘢知道好多嘢唔夠,又畀咗好多壓力自己,呢個係一個好差嘅循環嚟。」


AK的情緒問題連花姐也替他擔心,「上年年尾到今年年頭,花姐都有叫我睇醫生,因為有段時間我唔敢面對屋企人,成日坐喺廁所度坐幾個鐘唔敢出嚟,我同花姐講呢件事,佢話應該要去睇吓醫生。(有冇睇?)暫時未,因為我唔想承認自己係有病,我覺得可以解決得到,又準備開騷比較忙,冇乜時間去處理呢啲嘢,我OK嘅,我會以一個健康嘅Anson走落去。上年係學習點樣去釋放自己壓力好重要一年,其實經歷過1月1號同埋呢幾個月之後,我自己係好咗嘅,亦都搵到個方法去令自己舒服啲,唔好畀咁大壓力自己。」

AK去年奪得《新城勁爆頒獎禮2020- 勁爆新人》。
AK去年奪得《新城勁爆頒獎禮2020- 勁爆新人》。
連花姐也很擔心AK情緒問題,一度叫他去睇心理醫生。
連花姐也很擔心AK情緒問題,一度叫他去睇心理醫生。
AK在情緒唔好時,會瘋狂練結他到零晨時份。
AK在情緒唔好時,會瘋狂練結他到零晨時份。
出道以來, AK深得「生粉」(粉絲專屬名稱)支持。
出道以來, AK深得「生粉」(粉絲專屬名稱)支持。
去年AK推出隊友Ian作曲的《蝸牛》,更出兩人合唱版。
去年AK推出隊友Ian作曲的《蝸牛》,更出兩人合唱版。
AK跟隊友Jer和Anson Lo分別出solo歌,齊爭新人獎。
AK跟隊友Jer和Anson Lo分別出solo歌,齊爭新人獎。
其他文章
hd