首頁 即時娛樂

【頭條獨家】 花姐湊仔苦與樂(一)之 MIRROR令夢想成真

20/04/2021 14:00:00
花姐開心只花兩年多時間,MIRROR和ERROR已經做出不錯成績。
花姐開心只花兩年多時間,MIRROR和ERROR已經做出不錯成績。

ViuTV《全民造星》出身的MIRROR和ERROR近期爆紅,節目監製兼經理人花姐(黃慧君)肯定是最大推手,《頭條》一連多日同花姐細數「湊仔」苦與樂。2018年11月3日MIRROR正式出道,宣佈12月舉行首個演唱會,花姐陪12個仔接受《頭條》訪問,當時花姐講了很多對MIRROR期望,當時希望他們的出現會令娛樂圈變得更好,想不到短短兩年半,囝囝已成功幫花姐實現了不少夢想,締造了不少奇蹟。撰文:杜淑霞 攝影:譚壹致

花姐對MIRROR的期望,一班囝囝已成功幫她實現了不少夢想。
花姐對MIRROR的期望,一班囝囝已成功幫她實現了不少夢想。
ERROR四子的搞笑才華,觀眾一定認同。
ERROR四子的搞笑才華,觀眾一定認同。



2018年花姐說:「我以前係四大天王年代做PA(助理編導),真係有啲情意結,當年佢哋上《勁歌金曲》就群情汹湧,但係𠵱家冇晒呢啲嘢。」

現在每次MIRROR成員現身,都會有追星情況出現,花姐又有何感受呢?

花姐說:「梗係開心啦!同埋愈嚟愈多(fans)。開頭做完《造星》有班fans,呢班fans都支持緊佢哋,跟住仲慢慢見到唔同嘅人𠵱家都係佢fans!數目嘅增加係一定會開心,唔止姜濤一個,見到MIRROR其他成員IG嘅follower,或者跟佢哋嘅都開始有增加,係好戥佢哋開心,但係我仍然不停咁提醒佢哋,你哋行緊條偶像嘅路,會有好多fans跟你哋,好鍾意你哋,我會好似嚴母咁不停迫佢哋學嘢,你一定要話畀人哋聽有實力,唔可以好似初初行出嚟咁樣,覺得你哋係班靠外表嘅artist,我希望你下次訪問我時再playback畀我睇,原來我可以做到,𠵱家佢哋係一班有實力嘅偶像。」

2018年花姐說:「如果將佢哋擺埋一齊,可能會令香港樂壇冇咁靜。」

果然MIRROR出現令樂壇風起雲湧,出道兩年已經在樂壇頒獎禮奪大獎,花姐見到班仔得獎時有何感受?

花姐說:「我好記得MIRROR初出道過咗兩個月就《叱咤》頒奬禮,我哋一齊行入去後台時一打開門,全部人靜晒望住我哋,佢哋冇乜嘢,但係我覺得MIRROR係唔屬於樂壇,我就同自己講希望有一年嘅《叱咤》,大家會認同我哋,我哋係屬於呢個樂壇,有為呢個樂壇唱歌跳舞表演。今年MIRROR有人認識,同埋好多謝啲DJ支持,過咗《叱咤》頒獎禮後,我哋更加受到以前唔認識我哋嘅人注視,係好開心,我有為呢件事感動到喊,攞獎後感動同擔心到喊,因為增加咗我壓力,我應唔應付到我嘅工作量?我可唔可以帶佢哋行得更好嘅路呢?以前我同自己講我係一個冇經驗嘅經理人,我好驚行錯路,但係𠵱家我仲驚,佢哋係有能力行得好,會唔會因為我錯誤決定令佢哋死呢?嗰種壓力又唔同咗,又大咗,我只可以承諾為佢哋做到最好,我可以搵到最好嘅班底幫佢哋,我希望仲有氣有力,可以盡力幫佢哋令佢哋行得更加好。」

MIRROR每次現身的fans追星情況,拍得住四大天王年代。
MIRROR每次現身的fans追星情況,拍得住四大天王年代。
MIRROR興奮在《Chill Club頒獎典禮》奪得多個獎項。
MIRROR興奮在《Chill Club頒獎典禮》奪得多個獎項。



對於姜濤年僅21歲破紀錄成為最年輕「叱咤最喜愛男歌手」及「叱咤最喜愛歌曲」雙料得主,更引發「「姜濤效應」,更有人形容將會是MIRROR時代,花姐又有何感受?

花姐說:「𠵱家我得到成果係比我預期多,我冇諗過MIRROR過咗兩周年後,我完全冇諗過姜濤會攞咗『我最喜愛男歌手』,我仲記得去頒獎禮之前,同姜濤、Ian講,你哋上年已經競逐新人獎,阿姜你已攞到新人獎,照歷史嚟講你唔會有機會上台,我自己係咁預計件事,所以姜濤喺兩年後攞到「我最喜愛男歌手」同「我最喜愛歌曲」,對我同姜濤嚟講係好大嘅bonus,亦係好大推動,努力原來有人睇到,令到你大力啲行。雖然有部份冇我預期咁多,但係都有啲位我係未行得未夠好,例如:我唔可以將12個成員完全喺同時間推出,令到佢哋有各自各嘅路,好老實,有啲成員仍然見到佢唔夠知名度,或者唔係好夠job。我同自己講畀多兩年我,MIRROR 12個加埋ERROR 4個,佢哋一定可以喺娛樂圈唔同部份會見到大家,我希望佢哋喺娛樂可以有唔同工作,令到多啲人認識佢哋。」

花姐究竟覺得那個MIRROR成員發展得未夠好呢?

「第一個應該有機會係Jeremy(李駿傑),佢係好有特色嘅歌手,可能以前黃耀明或者張國榮年代會有呢類歌手,妖妖哋咁,佢唱歌好穩陣,跳舞亦好,好全面,性格亦都好,佢係應該有機會,好多fans都DM我,點解你唔畀機會Jeremy,當然背後有好多原因,我一係就唔推,一推出嚟我唔可以畀佢有機會失敗,我想等件事ready先。第二個係Tiger(邱傲然),佢係默默耕耘咗好多,佢為自己準備咗好多,機會係畀有準備嘅人,佢係值得有機會。其他都有佢哋工作崗位,Frankie(陳瑞輝)同Alton(王智德)就綜藝,我同公司商量覺得佢哋係適合綜藝,其他監製反應都OK」

2018年花姐解釋未有安排姜濤和Ian(陳卓賢)個人發展原因,「佢哋𠵱家實力,究竟可以行得幾遠呢!?趁喺呢度(MIRROR)有咁多資源,同埋咁多兄弟支持,儲多啲經驗同彈藥,咁將來會有實力行遠啲,實際過𠵱家趁有個勢就行出去。」

花姐有冇後悔過當日決定呢?

花姐說:「我𠵱家諗番我係冇錯,好彩我嗰時堅持,因為姜濤係個完全唔識表達自己嘅人,唔係好識點樣同人相處,佢甚至接觸嘅音樂都唔多,當佢入咗MIRROR,接觸好多兄弟幫助佢習慣同人溝通,接觸到譬如Lokman原來鍾意呢啲音樂會跳呢啲舞,佢同11個兄弟可以學到好多,呢個學習過程令佢睇多啲嘢,𠵱家會發現佢無論做訪問,或者同其他artist溝通未必係好好,但進步咗好多,所以我覺得冇錯,遲半年單飛唔算太過份。Ian,佢可能有能力比賽完出嚟單飛,佢係好有才華,但嗰陣唔係屬於全面,屬於創作歌手,但𠵱家睇Ian除咗好有才華嘅創作歌手,跳舞都一路進步緊,唔排除將來唱到啲快嘅R&B,可以跳舞,佢𠵱家識裝扮自己,覺得要練肌肉,所以我都冇後悔。」

姜濤以年僅21歲破紀錄成為最年輕「叱咤最喜愛男歌手」及「叱咤最喜愛歌曲」雙料得主。
姜濤以年僅21歲破紀錄成為最年輕「叱咤最喜愛男歌手」及「叱咤最喜愛歌曲」雙料得主。
花姐認為第一個應該有更多機會成員是Jeremy。
花姐認為第一個應該有更多機會成員是Jeremy。
花姐大讚Tiger默默耕耘,值得給予機會。
花姐大讚Tiger默默耕耘,值得給予機會。
花姐覺得Frankie和Alton最適合在綜藝節目發展。
花姐覺得Frankie和Alton最適合在綜藝節目發展。
花姐沒有後悔《造星》後,未有即時安排姜濤和Ian作個人發展。
花姐沒有後悔《造星》後,未有即時安排姜濤和Ian作個人發展。
花姐坦言Ian加入MIRROR後改變不少,自動波操肌。
花姐坦言Ian加入MIRROR後改變不少,自動波操肌。
其他文章
hd