首頁 即時娛樂

【頭條獨家】花姐湊仔苦與樂(二)之 為16個仔拍廣告一個仙都冇袋

22/04/2021 14:00:00
花姐為了幫補16個仔仔工作使費,拍廣告竟然一個仙都冇袋。
花姐為了幫補16個仔仔工作使費,拍廣告竟然一個仙都冇袋。

花姐(黃慧君)講湊MIRROR和ERROR苦與樂,繼續由2018年11月3日MIRROR正式出道講起,當時花姐接受《頭條》訪問時話,有構思MIRROR仿傚AKB做法,花姐這次就解釋打消念頭的原因;她又公開原來有個未圓的導演夢;又講到雖然MIRROR和ERROR現在勁拍廣告,但要靠花姐幕前演出幫補的背後原因。撰文:杜淑霞 攝影:譚壹致

花姐解釋放棄MIRROR仿傚AKB,其中一個原因是不想破壞他們兄弟情。
花姐解釋放棄MIRROR仿傚AKB,其中一個原因是不想破壞他們兄弟情。
花姐認為ERROR就算製作費不多,也有能力拍出好看的MV。
花姐認為ERROR就算製作費不多,也有能力拍出好看的MV。



2018年花姐說:「下年會再搞《全民造星》,但未必係男仔,我有個夢想《全民造星》嘅MIRROR,唔係個組合咁簡單,係個樂壇歷史,我想好似AKB咁,訓練班有夢想嘅人,加入去等佢哋繼續行MIRROR呢條路,佢哋都會大,都會個別發展,可以幫多啲人入行,將呢個精神帶落去。」


花姐究竟之後為何又要改變初衷?


花姐說:「我第二年冇話好大膽咁將其他人滲入MIRROR,(嗰時話想加女仔?)我唔夠膽咁做(係咪《頭條》報道後fans好大反應?)係呀!但我唔係淨係因為fans好大反應,係聽佢哋好多意見都有啱嘅位,如果將啲人滲落去MIRROR度,好多人對佢哋有感情,陪佢哋一齊長大,由比賽到組合,突然佢哋已經唔屬於MIRROR,可能會令到fans破滅咗某啲嘢。而MIRROR畢業又係咪件好事呢?!再滲人入去會唔會影響中間默契?!冇咁團結有兄弟情呢!?好多呢啲考慮就唔搞MIRROR,唔影響MIRROR精神,我就用《全民造星》包裝呢件事,第一屆做到MIRROR;第二屆做到P1X3L同好多單頭嘅人;第三屆令到本身入咗行嘅歌手,更有實力發展,佢哋都屬於《全民造星》。」


花姐監製了三屆《全民造星》以來,遇到最大難題又是甚麼?


花姐說:「我同製作團隊最難係拍完edit出街,真係好辛苦,因為用好多唔同機拍好多唔同人,有好多segment真係災難,基本上佢哋嗰三個月冇返過屋企,輪流返屋企一日,我好開心遇到班同我一齊癲嘅團隊,唔會斤斤計較,為咗節目肯捱更抵夜,但我每次開《全民造星》都會有人嗌辭職,因為真係太辛苦,冇導演肯借過嚟我嗰組!(做經理人後每年只拍《造星》?)同魯生傾咗一年做一個節目,佢就預我做《全民造星》囉!但我同寶姐(編審)都好想做其他節目,同埋我好想拍drama。我做《造星》之前,我寫咗個故事大綱畀魯生(高層魯庭暉)睇,嗰時魯生都話呢個故事OK,但係要繼續寫劇本同分場。我諗每個做製作嘅人,都有個導演夢,我由細到大都係跟綜藝同埋音樂組,冇機會拍drama,自己可以寫到個20集劇本係件好偉大嘅事。做《全民造星》跟住都冇機會寫,啱啱呢個月我再pick up番,希望快啲完成,可以再sell畀魯生。但我唔會特登寫個劇本for MIRROR,呢個係我咁重要嘅BB,一定搵最啱嘅演員,佢哋都要casting。」

由於MIRROR是偶像男團,花姐覺得MV製作費不能慳。
由於MIRROR是偶像男團,花姐覺得MV製作費不能慳。
雖然MIRROR吸金力驚人,但花姐坦言要12個人分每人收入也不多。
雖然MIRROR吸金力驚人,但花姐坦言要12個人分每人收入也不多。



2018年花姐講到ViuTV高層魯庭暉跟金廣誠對搞MIRROR睇法:「如果唔令到呢個樂壇或者演藝圈好,大家睇住佢沉落去,大家都唔會搵到錢,不如使少少budget,令呢個圈將來更好,佢哋比較有遠見。」


出道兩年幾MIRROR和ERROR接拍的廣告量驚人,是否已好賺錢?


花姐說:「預計5、6年先至可以回本,好多廣告都唔代表(回本),我哋投資都好多,大家都知做音樂係好蝕本嘅嘢,佢哋每次出嚟化妝、梳頭都係龐大數字,佢哋學做戲或者學樂器數目係好大,你諗吓我哋一年做廿幾隻歌,可能係其他唱片公司一倍!(一年使幾多?)梗係有7位數,點解成日都話要自己揸車,想慳埋慳埋佢哋可以上堂音樂唱歌堂。佢哋第一年出道新人,好多job唔夠膽收好多錢,仲要分畀12個人,跟住第二年社會運動同埋疫情都令佢哋少咗好多機會,但係嗰段時間對公司或者16個囝囝都好難,我記得其中一個成員同我講,『我連搭車去rehearsal都冇錢。』(佢哋冇底薪?)有,但係唔夠,佢哋要有外面工作先得,但公司已經對佢哋好好,出面好多公司連底薪都冇,魯生同金生係個慈善家,幫佢哋捱得過,連去rehearsal冇錢真係好心痛。大家都覺得MIRROR好賺錢,暫時係錯覺,我好希望第時唔係錯覺。」


花姐經常親自上陣拍廣告,究竟同MIRROR和ERROR又有何關係呢?


花姐說:「我唔enjoy喺幕前,但拍廣告係有原因,想減少公司負擔,令MIRROR有更好嘅嘢,ERROR我唔擔心,佢哋有生存方法,唔夠錢都可以拍到隻好好嘅MV,MIRROR係需要包裝嘅男團,唔可以求求其其,搵12套衫都係錢,公司已經投資咗好多喺佢哋身上,我可以拍廣告賺到錢減輕公司負擔。(你冇入袋?)一個仙都冇,我本身唔應該擁有呢筆錢,我唔係幕前人(算唔算為佢地犧牲色相?)個個都係咁講,我只係覺得拍咗攞呢啲錢可減輕負擔,譬如當姜濤拍MV over要同公司交待,但有筆錢幫手頂咗條數喎!袋住喺度當個基金,就算冇工開有個基金當應急都好。我成日講笑,公司冇預計Edan(呂爵安)同肥仔(梁業)出幾多隻歌,我就話畀住隻歌你哋出住先,睇吓效果,但新人出一隻歌真係搞唔掂,我諗住公司唔得都諗住攞呢個基金幫佢哋出第2隻,𠵱家公司都認同佢哋實力,出第2隻歌冇問題!(Edan好爆!)係!Edan係最唔使多謝我,佢係自己努力令大家鍾意佢,唔係我畀機會佢,佢以前《造星》幾咁努力,做綜藝幾咁投入,佢係憑自己實力得到今日嘅嘢。」

人氣勁旺的姜濤和Edan,近期頻頻拍廣告。
人氣勁旺的姜濤和Edan,近期頻頻拍廣告。
花姐早前跟《全民造星III》參賽者Timo齊拍銀行廣告。
花姐早前跟《全民造星III》參賽者Timo齊拍銀行廣告。
Edan的《E先生連環不幸事件》MV已過200萬點擊,花姐直言他受歡迎全靠自己努力。
Edan的《E先生連環不幸事件》MV已過200萬點擊,花姐直言他受歡迎全靠自己努力。
花姐本打算拍廣告賺錢,可用作肥仔同Edan下首歌的製作費。
花姐本打算拍廣告賺錢,可用作肥仔同Edan下首歌的製作費。
其他文章
hd