首頁 即時娛樂

【頭條獨家】無懼港片尺度收窄 陳健朗繼續創作 林家棟籲電影人勿先自設限制

16/06/2021 21:00:00
昔日獲前輩提拔的家棟如今升呢影帝,有能力便落力照顧一班新人,仲義演陳健朗執導的新片《手捲煙》。
昔日獲前輩提拔的家棟如今升呢影帝,有能力便落力照顧一班新人,仲義演陳健朗執導的新片《手捲煙》。

2017年,林家棟憑電影《樹大招風》榮膺三料影帝,地位提升但佢從來冇打算加片酬,為撐新生代,更以零片酬接拍陳健朗處男執導的電影《手捲煙》。以往得到不少前輩給予機會的家棟直言,有能力時便有責任提拔新人,又讚一班90後對電影充滿熱誠又有火,相信新舊糅合可創作更多片種。對於港產片拍攝限制可能愈收愈窄,可擔心影響創作?他說:「唔好自己設限先,諗咗自己想講咩先,限制自己創作仲衰。」陳健朗也表示定下母題才最重要,目前正籌備下一部電影。撰文:黎寶倫攝影:譚壹致髮型:梁佇鳴Alex @ Salon Nova(林家棟)、 WiL Wu(陳健朗)化妝 : 張楊蕊而@ J.A.C.K. Factory(林家棟)、 WiL Wu(陳健朗)場地:Premiere Elements貴賓影廳

電檢條例修訂上周五生效,家棟與陳健朗表示會做好本分,不擔心創作受影響。
電檢條例修訂上周五生效,家棟與陳健朗表示會做好本分,不擔心創作受影響。
《手捲煙》涉及黑社會、販毒題材,陳健朗指故事純屬虛構,沒有鼓吹成份,不擔心違反新條例。
《手捲煙》涉及黑社會、販毒題材,陳健朗指故事純屬虛構,沒有鼓吹成份,不擔心違反新條例。


為求拍攝順利,陳健朗在林家棟建議下花了8個月度劇本,「開頭都戰戰兢兢,甚至覺得好攰,有次家棟哥問:『我係咪好難搞呀?』我諗咗幾秒答:『你都幾X難搞嘅……』跟住佢就笑,但我明白演員係要深化角色、抽絲剝繭,正因拍攝前不停發掘劇本嘅可能性,所以去到現場冇搓死圈。」家棟解釋,過去數年外語片票房遠遠拋離港產片,要令觀眾重拾對本地電影的關注和熱度,首要是寫好劇本、做好本分。

香港電影仍有好多空間
香港電影圈多次陷入低潮,家棟稱自己亦有責任,「作為演員拍十套都係同一題材,我會好驚囉!全部一式一樣嘅話,將心比己,觀眾又會點呢?」《電影檢查條例》修訂剛於上周五生效,資深電影人田啟文擔心影響業界創作,家棟認為先不要自設限制:「大膽咁問,而家畀你去伊朗拍,你堅唔堅持要着比堅尼呀?咁唔去伊朗咪得囉!香港仍然有空間,好多題材可以講,我覺得首先諗咗自己想講咩先,條件容許咪做,唔容許咪另闢一條路囉。」陳健朗也認同最重要是想好故事的中心訊息,「知道自己想講咩嘅時候都有好多方法,你可以抽離、未必要紀實。」

多得家棟在開拍前不斷拋問題,讓陳健朗更熟悉文本與角色,拍攝時能夠清晰地向演員講解。
多得家棟在開拍前不斷拋問題,讓陳健朗更熟悉文本與角色,拍攝時能夠清晰地向演員講解。
跟新晉尼泊爾裔演員Bipin Karma合作,家棟認為一個多元社會需有不同火花。
跟新晉尼泊爾裔演員Bipin Karma合作,家棟認為一個多元社會需有不同火花。


多謝前輩提攜薪火相傳
提到近年提攜不少新人,今次更零片酬撐新導演,家棟謙稱只是回饋電影圈,皆因出道以來遇上不少好前輩,給予機會兼教曉他做人處事,語畢他即萬梓良上身,重現對方當年鬧導演一幕,「你唔好成日畀嘢我講啦,畀吓啲新人講啦,淨係見我有鬼用咩!做戲兩個人做㗎嘛,自己一個做晒咩!」家棟指從對方身上看到電影中的演員應互相配合,故現在也要求多分配戲份給其他演員。

問到如何報答家棟?陳健朗說若將來Budget許可會寫一個得意角色畀對方玩。那麼還恨演甚麼?家棟即怒吼:「點解我啲戲成日冇愛情線㗎!(渴望愛情?)唔係,個個做主角都有拍拖、結婚戲,我啱啱嗰部講結婚都唔愉快㗎,硬係冇啲Sweet嘅!」並謂觀眾和自己都嫌悶,希望再挑戰愛情片和喜劇。

家棟稱從新生代身上學識堅持,間中也讓他們碰釘從中學習,又笑指陳健朗有少少固執。
家棟稱從新生代身上學識堅持,間中也讓他們碰釘從中學習,又笑指陳健朗有少少固執。
陳健朗打算度身訂造一個好玩角色來報答家棟義演,後者即笑稱好想在戲中談戀愛!
陳健朗打算度身訂造一個好玩角色來報答家棟義演,後者即笑稱好想在戲中談戀愛!
當年跟師父萬梓良合作,見對方為後輩爭取對白和鏡頭,家棟笑言以為他幫緊自己即暗爽。
當年跟師父萬梓良合作,見對方為後輩爭取對白和鏡頭,家棟笑言以為他幫緊自己即暗爽。
去年憑《手捲煙》角逐金馬影帝的家棟稱只享受拍攝過程,沒想過再攞金像最佳男主角。
去年憑《手捲煙》角逐金馬影帝的家棟稱只享受拍攝過程,沒想過再攞金像最佳男主角。
恨做導演的家棟指新片《殺出個黃昏》是自己想講的題材,但自言太難搞還是做回監製。
恨做導演的家棟指新片《殺出個黃昏》是自己想講的題材,但自言太難搞還是做回監製。
陳健朗無懼家棟做導演爭飯碗,認為多元及不同題材的作品才令觀眾回歸港產片。
陳健朗無懼家棟做導演爭飯碗,認為多元及不同題材的作品才令觀眾回歸港產片。
其他文章
hd