首頁 即時娛樂

【頭條獨家】參加《造美人》3個月食唔飽 冠軍Stella為做女版強尼戰勝肚餓

30/07/2021 22:00:00
Stella捱住餓參加《造美人》就是為入娛樂鋪路,她更想成為女版強尼。
Stella捱住餓參加《造美人》就是為入娛樂鋪路,她更想成為女版強尼。

一般選美鬥靚鬥好身材,ViuTV另類美選真人騷《造美人》就啱啱相反,參賽者要挖出自己最醜一面,連主持強尼、沈殷怡同練美娟都佩服她們的勇氣。本身做直播主持的冠軍27歲Stella(楊芷羚)亦承認要冒住打爛飯碗的勇氣參加比賽,中途更辛苦到想過放棄退賽。而Stella跟亞軍29歲Ice(嚴楚翹)和季軍24歲Ann(陳芊妤)參賽其中一個原因都為在娛樂圈發展鋪路,Stella坦承想成為女版強尼,主持演戲瓣瓣掂,想向演員路發展的Ice和Ann就最想跟鄧麗欣和凌文龍合作偷師。撰文:杜淑霞 攝影:梁志明

Stella認為自己上鏡面形仲可以再瘦,所以不排除將來再微調。
Stella認為自己上鏡面形仲可以再瘦,所以不排除將來再微調。
Stella比賽完了4個月開心身材冇走樣,「仲維持到喺決賽嘅磅數唔夠55、56 kg度,不過想線條再靚啲。」
Stella比賽完了4個月開心身材冇走樣,「仲維持到喺決賽嘅磅數唔夠55、56 kg度,不過想線條再靚啲。」




Stella一直好想玩真人騷,因覺得自己性格好適合團體生活,但之前見到《廣告女皇》或者《美選D.n.A》總覺得自己樣貌同身材都未Ready,直至見到《造美人》個post,「可以接納你覺得自己唔好嘅嘢,甚至係樣貎身形,我覺得好吸引我,呢次冇得say no啦!」對於三位主持都認為參賽者勇氣可嘉,Stella坦承是抱住打爛飯碗的勇氣參賽,「因為我本身係做直播,係有濾光鏡,着衫又可以遮同埋化妝可以就唔同角度,但如果上電視,我嘅身形係乘大一點五倍,我嘅勇氣係打爛飯碗,最驚係打爛咗個飯碗又黐唔番,好彩最尾個名額畀咗我入圍。」


辛苦到想退賽



鏡頭前性格開朗,屬心態好積極參賽者的Stella,原來面對地獄式減肥,決賽前亦一度想過放棄退賽,「我有3個月,冇超過一個星期食正常餐,真係好辛苦,但係嗰100日我係唔覺得辛苦。去到決賽最尾,我有一個半禮拜冇食過任何澱粉質,真係覺得好辛苦,我哋又好長時間要排舞,有一刻我係想退賽,因為我真係好攰,我覺得自己又瘦咗,真人騷又去到尾段,我想要嘅得益都攞咗,我又唔係求冠軍,工作人員feel到我情緒好down,同我講『你差一步,咁大分別咁fit,唔行埋呢步好蝕喎!』嗰刻我調整番自己心情。」除了想令自己變靚之外,Stella坦承參賽亦為娛樂發展鋪路,因明白做直播主持不可能做一世,未跟ViuTV簽約的她,如果有機會加盟,除了望有機會跟當紅的MIRROR和ERROR合作外,更加視強尼做奮鬥目標,「想做女版強尼,強尼佢唱歌好聽,又可以做頒獎嘉賓,又可以做埋司儀,仲可以做評判,呢個係目標嚟。」

決賽前Stella戒掉個多星期澱粉質,才能以這個fit爆身材現身。
決賽前Stella戒掉個多星期澱粉質,才能以這個fit爆身材現身。
Stella除了奪得《造美人》總冠軍,更得到「突破原美大獎」。
Stella除了奪得《造美人》總冠軍,更得到「突破原美大獎」。



輸在上圍級數


雖然輸了給Stella,但Ice和Ann坦言輸得心服口服,不過因三人感情勁好,又搞笑互窒時爆肚指她們只是輸了給Stella上圍cup數,Ann說:「我波細一定比唔上波大嗰啲㗎啦!哈哈!」Ice說:「我哋係鬥改變唔係鬥靚所以冠軍係唔靚㗎!哈哈!去到節目中間我都好想驗證一樣嘢,就係我唔係眼大鼻高嗰啲,又唔係身材玲瓏浮凸,我係咪一世都唔靚,出嚟攞第二喎!(Ann:我哋輸咗個波!)嗰零點4分,佢個波值零點4咋!差個cup!哈哈!其實節目話畀其他女孩子聽,靚唔係得一個方式同倒模嘅。」本身做演員的Ice,以及在演藝讀書的Ann兩人都承認得獎後加強了入行信心,亦希望有更多演戲機會,Ann最想跟凌文龍合作,「我哋本身識嘅,我哋上戲劇堂佢好多時都會坐喺度。」Ice就希望跟鄧麗欣學嘢,「我覺得佢演得好好,唔係初出道淨係賣外表,可愛嗰啲,而係真係好有戲。」

參賽時Stella肥腫難分,難怪她認為要抱住打爛飯碗的勇氣。
參賽時Stella肥腫難分,難怪她認為要抱住打爛飯碗的勇氣。
Ann、Stella和Ice參加《造美人》過程不但冇不和,仲變成好姐妹,互窒都唔介意。
Ann、Stella和Ice參加《造美人》過程不但冇不和,仲變成好姐妹,互窒都唔介意。
比賽後自信返晒嚟的Ice,唔再怕了影相。
比賽後自信返晒嚟的Ice,唔再怕了影相。
總分輸Stella零點4分屈居亞軍的Ice,更得到參賽者互選的「內在美人大獎」 。
總分輸Stella零點4分屈居亞軍的Ice,更得到參賽者互選的「內在美人大獎」 。
由參賽初期一直被評判認為樣貌標緻的Ann,但到現在才有自信望鏡頭。
由參賽初期一直被評判認為樣貌標緻的Ann,但到現在才有自信望鏡頭。
Ann是少數參賽者要增磅,但過程一度令她好迷失而想過放棄。
Ann是少數參賽者要增磅,但過程一度令她好迷失而想過放棄。
其他文章
hd