首頁 即時娛樂

獨家|姜濤暈倒前24小時 半夜攰到慘嗌:幾時返得屋企

19/09/2021 18:01:00
連續拍攝數小時吵架和打大交的動作場面,姜濤和阿Jer都交足功課。
連續拍攝數小時吵架和打大交的動作場面,姜濤和阿Jer都交足功課。

最近姜濤除了忙於拍攝新戲《呀媽有咗第2個》,還要出席廣告、代言活動,密集式工作終於體力透支。本月十四日姜濤出席一項公開活動時就突然不適暈倒,活動臨時煞停,他更需要多名工作人員攙扶下離場,擔心死隊友和「姜糖」!

撰文、攝影∣娛樂組

倒帶回到姜濤暈倒前一天,本報獨家追擊到他一早便到達屯門為電影拍外景,全日着住超厚長袖戲服在猛烈陽光底下拍攝,期間姜濤和隊友Jer為拍一場互相摟打到瞓地戲份,姜濤更加打到喊,情緒大爆發,最終拍到凌晨兩點才收工,計埋返屋企兩個鐘車程,姜濤未休息回氣就已經要準備出席當天上午活動,行程緊密。

受不了胃痛和焗促

姜濤、盧瀚霆(Anson Lo)、呂爵安(Edan)、柳應廷(Jer)上周二(9月14日)在尖沙咀出席公開活動,四位隊員晨早九時先在店內進行拍攝,之後再轉到商場見傳媒拍同粉絲見面,不過姜濤出場唔夠五分鐘,原本已經面青唇白的他,影合照期間突然腳軟暈低地上,嚇到身邊隊友呆晒,全場粉絲驚呼,最後由多位工作人員火速扶他起身,再由大隻保安攙扶離開。事後,經理人花姐(黃慧君)在社交平台代姜濤報平安:「姜濤今早有少許胃痛,現場環境有點焗,加上閃光燈不斷,所以有少許腳軟而跣低。現在休息中沒有大礙,大家不用擔心,老姜答應我,呢兩日會好好休息。」知情者透露:「當日化妝嗰陣姜濤已經覺得唔舒服,同埋佢每次出活動知道自己好容易水腫,都會堅持唔食嘢,其實姜濤已經唔係第一次出活動時突然腳軟,之前都試過做訪問嗰陣忽然腳軟跌一跌!嗰日完咗活動有人見到有架白車入咗商場範圍,聽講佢去咗醫院check咗身體,證實無大礙至返咗屋企休息!」

在趕完戲當天早上,姜濤出席活動暈倒,現場驚呼。
在趕完戲當天早上,姜濤出席活動暈倒,現場驚呼。
13/9 10:00am 準時開工

早上十點姜濤已準時開工,多人陪同到達拍戲現場。
13/9 10:00am 準時開工 早上十點姜濤已準時開工,多人陪同到達拍戲現場。



出事前拍連場打鬥

姜濤最近忙着拍攝電影《呀媽有咗第2個》,幾乎每日都日以繼夜開工,又要兼顧男團的其他工作,忙到冇時間休息。在姜濤「出事」之前,據知他已經連續多日全天候趕戲。而暈倒前一日,姜濤幾乎開足二十個鐘頭工,周一(9月13日)早上十時,姜濤和同劇的兄弟Jer一早到達屯門拍攝現場拍外景,在三十多度猛烈陽光高溫下,他需要穿着黑色厚身衛衣戲服,衛衣內更有白色底衫打底,儘管休息期間有助手為二人擔遮避太陽,但大部分時間姜濤和Jer都要在暴曬下對戲和試位。當日拍攝一場比較重要的場口,兩人需要大吵一場後再大打出手,拍攝前二人非常專業企埋一邊培養情緒,一Roll機,兩兄弟七情上面對罵,之後Jer忍不住先出手撩交打,姜濤當然唔執輸還手,兩人打得咬牙切齒,姜濤更成件衞衣被扯起露出底衫,又打到碌晒地,十分投入角色的姜濤,期間一度情緒大爆發,互打一輪後激動到喊!打鬥場口由於要配合不同角度,兩人重複對打大約十次,一cut機,打到疲累不堪的姜濤仍然專業地堅持睇playback,待導演滿意後,才敢返回車上休息。現場所見,情緒爆發完的姜濤全程悶悶不樂,熱到冇晒表情的他攰到任由女助手揭起件衫為他吹風扇乘涼。

深夜連發十多post

姜濤和Jer拍完了互打場口後,Jer率先收工。晚上繼續有沉重戲份的姜濤就在保母車上休息了半粒鐘,待劇組set好機,接着再在海旁和毛舜筠拍對手戲。對住個海成晚的姜濤特別感觸,在拍攝的空檔,他突然在社交平台連續發十多個post,抒發自己的一點感受。姜濤表示自己拍戲期間能夠把情緒宣泄出來,亦坦認自己在公開場合笑容變得比較少,因為自己害怕跟別人接觸,又稱自己開始對身邊的人感到懷疑,而且總是覺得自己只是一個被比較的標籤,不過最後都不忘答應粉絲翌日出席活動時,會給大家「一個修理好的自己。」可惜最終體力透支在活動上暈倒。

正式拍攝前,二人已經要出盡力試戲排練打戲。
正式拍攝前,二人已經要出盡力試戲排練打戲。
12:00pm 烈日暴曬

時近中午烈日當空,兩人無遮無擋在現場培養情緒,姜濤不時按着頭部。
12:00pm 烈日暴曬 時近中午烈日當空,兩人無遮無擋在現場培養情緒,姜濤不時按着頭部。


攰爆仲要踩單車

姜濤和毛舜筠在屯門海旁拍攝到凌晨,完成那場戲後,着住白色長袖衫加黃色T恤的姜濤由助手陪同返回保母車,期間姜濤好像已經攰到爆,嚷着問助手何時可以回家,沿途有前來釣魚的途人禮貌地叫姜濤簽名時,亦給身旁女助手狠狠拒絕。之後再拍攝一場踩單車劇情,拍到兩點幾才正式收工,仲要由屯門返屋企起碼兩個鐘車程,姜濤眨吓眼又要再準備出席大清早的活動。知情人士透露:「其實姜濤一早都有向公司要求拍戲期間想專心一意做好個角色,希望公司係呢段期間唔好接其他工作畀佢做,可惜之前接落咗好多活動,又要夾埋其他隊友嘅期,所以最終都需要喺中間攝啲期做其他工作,姜濤唯有頂硬上!結果搞到身體唔夠休息之餘又間接影響情緒。」

唞咗日半再頂硬上

姜濤在活動中途不適暈倒,原定要接住趕到東壩郊外和毛舜筠繼續電影拍攝至晚上,不過導演彭秀慧知道姜濤情況後,即時全面配合,還表示會給他足夠的時間休息。終於有得唞下氣的姜濤,在家休息咗一日半,工作至上的他為免阻礙拍攝進度,星期四一早堅持繼續開工。為了拍劇更上鏡,姜濤一如以往習慣在開工前一晚打籃球出一身汗,更加「打卡」並發限時動態留言「我沒事」和大家親自報平安!瞓醒一覺,便一早和數百個「姜糖」在海洋公園拍戲,見到「姜糖」們就親切問候大家「食咗嘢未?」,不過相信「姜糖」必定反過來擔心姜濤唔食嘢影響身體。知情人士指:「《呀媽有咗第2個》下個禮拜就會煞科,姜濤之後就會全力準備拉闊演唱會嘅綵排,所以佢唔想因為自己嘅問題搞到劇組,同埋影響自己的表演質素!」

原文刊於《星島日報》名人雜誌(逢周日見報)

兩人熱到呆晒,但仍耐心地等埋位。
兩人熱到呆晒,但仍耐心地等埋位。
小休去洗手間時,助手為姜濤拉開衫吹風扇。
小休去洗手間時,助手為姜濤拉開衫吹風扇。
14/9 2:30am 捱到殘爆 到了深夜時分,姜濤仍在趕戲,他忍不住問「何時可以返屋企?」
14/9 2:30am 捱到殘爆 到了深夜時分,姜濤仍在趕戲,他忍不住問「何時可以返屋企?」
姜濤捱足一日,又打又曬又踩單車,成個人殘晒。
姜濤捱足一日,又打又曬又踩單車,成個人殘晒。
11:30am 現身活動 姜濤不適,身邊的隊友也十分擔心,其中Anson Lo憂心至眼紅紅。
11:30am 現身活動 姜濤不適,身邊的隊友也十分擔心,其中Anson Lo憂心至眼紅紅。
16/9 7:00am 重投拍戲

本報獨家追蹤16號姜濤小休了一日半再度投入工作,希望不阻碍拍攝進度。
16/9 7:00am 重投拍戲 本報獨家追蹤16號姜濤小休了一日半再度投入工作,希望不阻碍拍攝進度。
開工到半夜,姜濤突然發了多篇感言,看似情緒低落。
開工到半夜,姜濤突然發了多篇感言,看似情緒低落。
連日來姜濤都趕戲,還被毛姐偷拍他在現場的睡相。
連日來姜濤都趕戲,還被毛姐偷拍他在現場的睡相。
其他文章
hd