首頁 即時娛樂

頭條獨家丨Lokman認有私心向AK Say Sorry 恨同Alton 阿Dee出歌意義大過《虎道門》

23/09/2021 21:00:00
Lokman自認私心想同Alton和阿Dee合唱,AK唔單止冇嬲仲話好期待。
Lokman自認私心想同Alton和阿Dee合唱,AK唔單止冇嬲仲話好期待。

MIRROR正副隊長Lokman和Anson Kong(AK)最近首度推出合唱歌《虎道門》,兩人都話由創作到拍MV都超好玩,好想再有下次。不過講到最恨合作隊友,Lokman竟然自認私心話想同Alton和阿Dee,仲講到明意義大過同AK合作,不過已靠拍《調教你MIRROR》醫好情緒問題的AK又點會咁小氣,仲話好期待作品面世。而兩兄弟又自爆拍《水著考有Feel》似足去度假,更狂笑自動放棄機會的Tiger勁後悔。撰文:杜杜 攝影:葉君海 形象:PIPA Creative 髮型:Man Chan@Chic Privat i Salon 化妝:Giann Cheung@AnnieG. Chan Makeup Centre 服裝:Harvey Nichols、Giuseppe Zanotti 場地:Jas Party

提到拍《水著考有Feel》似足度假,兩人好似小朋友一樣勁興奮。
提到拍《水著考有Feel》似足度假,兩人好似小朋友一樣勁興奮。
Lokman和AK合唱完都覺得未夠喉,希望再有下次合作。
Lokman和AK合唱完都覺得未夠喉,希望再有下次合作。



AK去年開始出Solo時,已想到搵兄弟合作,「好想做首歌有Rap元素,第一個就諗起Lokman Rap嘅時候,好想同佢做隻歌,但係上年第一年出Solo,花姐話出自己歌先,今年出咗《黑之呼吸》後,我就問花姐可唔可以有呢個計劃,佢就話『好,你哋自己去玩』。」兩人都話合作超爽,已預告隨時再合作,Lokman更話寧願出合唱歌多過想出Solo,「畀我揀想揀合唱歌多啲,因為真係好好玩,Solo都好玩,可以講自己嘢,但係同人交流多啲會正好多。」AK亦好認同,更自爆今年會再跟隊友合作,「我今年仲有兩隻歌出,其中一隻都會搵隊內嘅兄弟合作,同兄弟一齊玩可以有唔同火花,我就唔開名,大家期待吓!」



講到想跟邊個隊友合作,Lokman自認有私心組合,「好想我、Alton同埋阿Dee,我哋一齊做首歌個意義真係大,對唔住啦!(望AK)大過我哋呢首嘅,Sorry Sorry!(AK:明白嘅)」Lokman坦承好期待這個組合,初出道時已跟花姐提出過,「如果我哋出一首歌應該正喎!應該會好玩。」同樣期待的AK更連歌名都幫手度埋,「就叫《LA Trip》,我哋都見證呢件事,見到阿Dee同Alton嚟,見到佢哋咁樣我哋都好開心,都知道呢件事對佢哋三個嚟講係mean something,係個好難忘珍貴回憶。如果呢個組合出歌,我自己都好期待,到底你哋三個會搞到啲乜嘢呢!?」

見到AK開心番,一眾「生粉」應該安樂晒!
見到AK開心番,一眾「生粉」應該安樂晒!
Lokman最近為電影轉了兩次髮型,原來他一直想剪短,希望有更多角色選擇。
Lokman最近為電影轉了兩次髮型,原來他一直想剪短,希望有更多角色選擇。



AK靠《調教》醫好情緒問題

這天見到AK跟4月接受《頭條》時,壓力爆煲流下男兒淚分別好大,回復活潑開朗的他承認,拍《調教你MIRROR》令負面情緒一掃而空,連醫生都唔使睇,「佢哋幫我睇番好啦!佢哋呢班醫生,阿祖亦係一個好好嘅醫生,camp之後搵番自己亦都搵番大家,大家再連繫番一齊,好多嘢都解決咗,冇咁大壓力,就算有壓力可以交畀佢哋一齊分擔,係一個最大抒發。(同阿Jer心結解開咗係一個好重要關口?)嗰個心結其實唔係對阿Jer,其實係對自己,一時諗唔開鑽咗個牛角尖,解開咗個死結之後舒服晒!」



Lokman承認入camp期間大家朝夕相對,有助增進感情,「由起身到瞓覺都係12個一齊,迫住交流、傾偈,有時唔講唔講就會有啲誤會,或者溝通上錯誤,講咗出嚟握個手就搞掂。」AK再補充,「最緊要個拍攝係冇乜嘢做,去玩同食好嘢,我哋都同公司講每年十幾日畀我哋去個camp叉吓電。」兩人異口同聲話去離島都滿足,Lokman說:「唔好講離島,拍完上次個水上樂園(《水著考有Feel》),都覺得係放假。」因他們一連拍兩日,第一晚拍完大會安排了酒店給他們休息,AK說:「我哋帶齊晒聽歌嘅嘢,準備晒一齊睇咩戲,嗌乜嘢食,真係度假㗎!」AK更大爆本來他冇份享受,有個「傻仔」放棄咗機會,「Tiger拍完《力圖打排球》後話攰唔去,又話唔想曬黑,叫我幫佢頂,佢嗰時都未知道咁多細節,佢諗住辛苦嘢,點知係放假mode,畀咗個咁好嘅回憶我,佢知道之後勁後悔,哈哈!第二日出嚟後,我哋約埋一齊去睇阿祖嘅舞台劇,我哋不停畀啲相,講發生嘅事畀佢聽,佢幾鬼嬲呀!」所以他們好想疫情後一齊出trip,AK說:「好似之前拍《Mirror Go》咁樣出外景,真心想12個一齊出埠,阿祖都即刻報名話『唔理你哋去邊總之我要喺度』OK冇問題!」

Lokman和AK都好鍾意《虎道門》帶有日本風的MV。
Lokman和AK都好鍾意《虎道門》帶有日本風的MV。
對於MV只有Lokman爆肌,AK解釋是配合劇情需要。
對於MV只有Lokman爆肌,AK解釋是配合劇情需要。
Lokman跟 Alton和阿Dee出名好兄弟,更相約參加《造星》。
Lokman跟 Alton和阿Dee出名好兄弟,更相約參加《造星》。
《造星》十強到美國集訓,Alton和阿Dee都有驚喜現身。
《造星》十強到美國集訓,Alton和阿Dee都有驚喜現身。
Lokman和AK覺得《調教你MIRROR》對MIRROR意思重大。
Lokman和AK覺得《調教你MIRROR》對MIRROR意思重大。
4月,AK接受《頭條》訪問時,一度壓力爆煲流下男兒淚。
4月,AK接受《頭條》訪問時,一度壓力爆煲流下男兒淚。
Lokman和AK自爆跟Alton和Frankie拍《水著考有Feel》似足去度假。
Lokman和AK自爆跟Alton和Frankie拍《水著考有Feel》似足去度假。
放棄「度假」機會的Tiger,匯合Lokman和AK等去撐阿祖舞台劇。
放棄「度假」機會的Tiger,匯合Lokman和AK等去撐阿祖舞台劇。
其他文章
hd