首頁 即時娛樂

頭條獨家丨Dee哥為Lokman Alton犧牲單飛 娟姐約肥仔食飯培養感情

21/10/2021 23:45:00
Dee哥大讚娟姐是名副其實「辣妹」,堅食得辣。
Dee哥大讚娟姐是名副其實「辣妹」,堅食得辣。

食辣搞到在台灣call白車慘痛歷史的Dee哥,最近拍住娟姐(練美娟)主持《辣王傳》,大玩試食辣嘢,Dee哥直言同娟姐一齊拍時即揸流攤,而娟姐話晒「家屬」見Dee哥面青口唇白唯有幫佢頂。新劇跟肥仔演一對,娟姐自爆有約食飯培養感情。Lokman早前在《頭條》訪問時,話想跟Dee哥及Alton合唱,Dee哥坦承犧牲單飛機會都想成事。撰文:杜杜 攝影:葉君海 服裝:@lazynoon(娟姐)

Dee哥入行後壓力太大狂食,足足重了40磅。
Dee哥入行後壓力太大狂食,足足重了40磅。
娟姐直言近期為新劇放棄身形,可以盡情食。
娟姐直言近期為新劇放棄身形,可以盡情食。



Dee哥話受製作組所騙,以為只需睇班「辣妹」食辣,結果他變成膽集集要食,唯獨拍住堅食得辣的娟姐先有一線生機,「我喺你(娟姐)身上學揸流攤,有你喺度我就可以揸流攤!」不過,除了娟姐踢爆他節目中只是倒數第3食得辣外,他同時要拍電影等工作多多,休息唔夠仲要勉強食辣,搞到娟姐好替他擔心,「佢真係拍到面青口唇白。(冇入院?)其實要㗎!但係佢冇時間入。」Dee哥說:「我嘅意志控制住身體,唔可以入院,唔係其他一齊冧。」


熒幕初吻俾鄭中基

娟姐最近扮杜麗莎經典電影造型同鄭中基拍廣告成為熱話外,在新劇《反起跑線聯盟》跟緋聞男友肥仔演一對,一樣令人關注,她坦言同肥仔有感情戲好唔慣,靠約食飯幫手入戲,「收工我哋有一齊食飯聯絡感情,每次同拍檔都想工餘傾多啲偈,熟識多啲火花應該會好啲。」不過她強調同肥仔冇親密鏡頭,「個熒幕初吻會keep喺度,唔抗拒任何可能性,唔想講死咗一個。(鄭中基?)如果佢想我冇乜所謂,哈哈!」

Dee哥拍住娟姐主持《辣王傳》,該集必試最辣食物。
Dee哥拍住娟姐主持《辣王傳》,該集必試最辣食物。
Dee哥好期待與Lokman及Alton一齊創作,會撞出不少火花。
Dee哥好期待與Lokman及Alton一齊創作,會撞出不少火花。



提到Lokman早前在《頭條》訪問時,話想跟Dee哥及Alton合唱,AK仲幫手改歌名《L.A. Trip》,Dee哥非常贊成,「我諗有呢個機會,大家期待吓,我哋會極力爭取,我同花姐提出過想單飛唱歌,佢都唔畀唱,叫我唔好嘥錢,即係佢預咗我自己出錢。我個條件係唔單飛,你畀我同Lokman出歌,我諗花姐會接受到,我犧牲自己單飛機會。(歌名《L.A. Trip》?)呢個名唔差,去埋美國拍MV,搵埋娟姐着三點式,娟姐身材咁好。」但娟姐抗議:「我未應承咁快開呢個排頭,我話晒你家屬呀!(記:認家屬嘅?)你下次問又唔同講法。」

娟姐跟肥仔在新劇《反起跑線聯盟》演一對,兩人仲有個仔。
娟姐跟肥仔在新劇《反起跑線聯盟》演一對,兩人仲有個仔。
娟姐跟前輩鄭中基拍廣告,既緊張又興奮。
娟姐跟前輩鄭中基拍廣告,既緊張又興奮。
其他文章
hd