首頁 即時娛樂

頭條獨家丨黃子華狂窒細佬似做棟篤笑 《飯戲攻心》演張繼聰陳湛文大佬

19/01/2022 21:15:00


「子華神」黃子華繼去年《乜代宗師》後,今年再有賀歲片《飯戲攻心》,拍住張繼聰和陳湛文(Peter)合演三兄弟。三人雖然首度合作,但齋睇訪問時互窒的相處情況,已知好有火花,子華甫開始已聲言同兩人唔係好熟,話狂讚他的阿聰當他是古人,又笑指睇Peter 演的《三夫》大,更不肯俾他們稱呼「子華哥」,要求他們尊稱為「濟哥」。成個訪問勁多笑位,似十足㨂篤笑,暫時滿足一下一眾子華迷。採訪杜 攝影:沈健程、葉君海 髮型:Helen(子華)jobbylee@gmail.com(阿聰)Anthony Wong(Peter) 化妝:阿玉(子華)Levina Bo(阿聰)Lisa.C Makeup Art(Peter) mijosueye's Buddy(Peter)

《飯戲攻心》雖然未知幾時上,但子華、阿聰同 Peter先向《頭條》讀者拜個早年。
《飯戲攻心》雖然未知幾時上,但子華、阿聰同 Peter先向《頭條》讀者拜個早年。
戲中靠叉燒聯絡三兄弟親情,現實中子華感情最深是媽媽牌雪菜肉絲麵、阿聰最愛媽咪牌菜心炒牛肉,Peter就最掛住家中的炆冬菇。
戲中靠叉燒聯絡三兄弟親情,現實中子華感情最深是媽媽牌雪菜肉絲麵、阿聰最愛媽咪牌菜心炒牛肉,Peter就最掛住家中的炆冬菇。

講到三人戲裏戲外關係,子華搞笑話:「私底下真係唔係好熟囉!睇佢地戲大咁樣啫!睇《三夫》呀!無辦法,我喺戲入面係好愛佢哋,我成日遠距離睇住佢哋,睇睇吓有feel真係當佢哋細佬,𠵱家就番當佢哋前輩。」被玩的Peter無奈話:「點呀!《三夫》18年尾先上,咁你唔係大我好多歲喎!」不過他亦大讚子華,「一個係神級演員,一個係我好尊重嘅師兄,可以同佢哋首次合作當然係好緊張啦!我好驚我呢啲小師弟或者後輩出錯!俾佢哋揶揄取笑,但聰哥唔會藐視我,子華仲犀利,佢係一個好好嘅聆聽者,接收能力好高。」子華神回,「冇對白我唔應該講㗎嘛,咪唯有聆聽。」
子華唔准人叫「子華哥」,要叫就叫「濟哥」。
子華唔准人叫「子華哥」,要叫就叫「濟哥」。
阿聰讚子華不單喜劇強,演認真戲一樣好細膩。
阿聰讚子華不單喜劇強,演認真戲一樣好細膩。

自嘲變古人

阿聰最開心跟偶像子華合作,「對子華感覺同全香港人一樣,全部㨂篤笑同埋戲都有睇。」被阿聰狂讚,子華忍唔住再爆,「我開始覺得自己好似戴麟趾爵士,好似啲古人咁,變咗麥里浩夫人咁樣。」而私底下阿聰亦跟子華好啱傾,「我哋對武術好有興趣。」Peter玩踢爆,「拳賽就拳賽啦!武術!」阿聰說:「我哋講蔡李佛嗰啲你行開咗啫!」子華亦幫口,「點穴啲嘢你唔明㗎啦!」阿聰:「費事同你講,內功都冇。」Peter坦言冇份參與睇拳賽,子華即寸他,「佢成日想攀附我哋作為武術界嘅巨子。」阿聰話子華比他追得更貼拳賽消息。不過子華自爆戲中被阿聰搶女友鄧麗欣,但阿聰反駁,「佢會用搶,我會話我曾經讓過我最心愛嘅女人畀佢。」子華:「你都唔知佢讓咗畀你,『孔融讓梨』都話畀對方知呀大哥,但被讓都難能可貴嘅。」

Peter開心跟子華和阿聰合作偷師。
Peter開心跟子華和阿聰合作偷師。
子華和阿聰戲中兩兄弟會爭女友鄧麗欣。
子華和阿聰戲中兩兄弟會爭女友鄧麗欣。

追問阿聰和子華有否互相切磋,「戲入面有囉!」子華再爆,「咪中咗囉!梗係我中啦!手長腳長!」阿聰說:「我有支籐條要打佢,佢本身有個護脊喺後面,我可以盡情打落去,點知我拉弓時見到佢個護脊移咗位,但已經收唔到手,啱啱打中佢冇墊嗰度,我心諗死啦!」但子華笑說:「好彩,我都可以打返人哋一嘢。」Peter舉手,「咪還返一嘢畀我囉!」不過子華坦承被打時堅痛,「好彩係雞毛掃啫!嗰吓打完我都呆咗,好似搵車撞咗一下咁。」阿聰話之後大家冇停繼續演,反應好真實。
子華和阿聰戲中兩兄弟會爭女友鄧麗欣。
子華和阿聰戲中兩兄弟會爭女友鄧麗欣。
阿聰大談「濟哥」名字由來,竟然令只白躺着也中槍。
阿聰大談「濟哥」名字由來,竟然令只白躺着也中槍。

被尊稱「濟哥」

訪問期間,阿聰和Peter不時尊稱子華做「哥」,仲令白只躺着也中槍,阿聰說:「初初我梗係嗌子華哥,點會好似Peter咁一入嚟就嗌子華,我哋啲中生代好識規矩,但子華哥就話『白只嗰啲都係嗌我子華,但你嗌子華哥』,但係我真係衝破唔到。」子華:「佢已經畀呢行沾污咗佢清白嘅心靈,佢而家變咗個世界聰。」阿聰再解釋,「如果訪問時咁嗌,下面啲回應會話『你係乜水嗌人子華,我唔夠白只輩分高,攞獎後勁咗』」子華:「白只自從攞獎後就目中無人。」子華最後諗到方法,「有啲名好適合嗌哥,譬如發哥、四哥,但子華唔啱,我話可以嗌哥,但叫我做『哥』。」阿聰解釋,「你有冇睇過套江湖片係發哥做叫『哥』。」所講是發哥主演的《江湖情》和《英雄好漢》中黑社會大佬角色「李阿」,戲中被尊稱「濟Peter透露王菀之就最醒目,「佢直接嗌佢Kamisama(神)。」問到子華感受,他無奈說:「都唔知講緊咩文,佢哋日日都用唔同語文溝通。」
發哥主演的《江湖情》和《英雄好漢》中黑社會大佬角色「李阿濟」,戲中被尊稱「濟哥」。
發哥主演的《江湖情》和《英雄好漢》中黑社會大佬角色「李阿濟」,戲中被尊稱「濟哥」。
子華認為導演陳詠燊執導《飯戲攻心》,笑中有情懷會吸引到觀眾。
子華認為導演陳詠燊執導《飯戲攻心》,笑中有情懷會吸引到觀眾。

近年社會氣氛差,子華承認要拍喜劇○氹人笑更難,早前跟鄭中基拍廣告時都討論過,「𠵱家可唔可以拍一啲純搞笑戲,我哋都覺得唔得,所以我好鍾意呢套戲,佢有種情懷,當然有晒喜劇元素同戲劇效果,兩個親愛嘅兄弟鍾意一個女仔,同埋難度好高,用幾餐飯嚟到搞掂呢場,𠵱家需要呢啲戲,同埋香港觀眾個接受力,因為搞嗰啲純搞笑,短片睇晒,你點贏啲短片啫!一分鐘已經爆,再搞落去都攰唔會睇,真係要做到好引人入戲,先可以《飯戲攻心》。」
六位主角戲中有大量同場戲,日日都拍得好開心。
六位主角戲中有大量同場戲,日日都拍得好開心。
子華跟「馬來西亞女神」林明禎有感情戲,他大讚對方學廣東話叻。
子華跟「馬來西亞女神」林明禎有感情戲,他大讚對方學廣東話叻。
Peter戲中首次跟王菀之飾演一對。
Peter戲中首次跟王菀之飾演一對。

立即下載 | 全新《星島頭條》APP :https://bit.ly/3yLrgYZ

 

其他文章
hd