首頁 即時娛樂

獨家丨黎諾懿好享受身兼三職 自爆將監製3個新節目

19/08/2022 09:00:00


黎諾懿最近主持6集飲食節目《滿足的味道》,但拍足8個月,他承認成本貴過部劇集,自爆節目原本有12集,希望製作高質素節目,紀錄低一些香港將失去的美食,特別多謝高層曾志偉大力支持。他又透露已向志偉賣橋成功,會監製另外3個新節目,還很享受現在身兼演員、主持和監製3個身份。採訪杜 攝影:朱偉彥 場地:Velo Italian Bar & Grill

諾懿已計劃再監製3個新節目,到時應該有排忙。
諾懿已計劃再監製3個新節目,到時應該有排忙。

諾懿認為再做飲食節目,要給觀眾新鮮感,除了高質,還要有意義,「其中一個重要主題,我哋下一代未必食到呢個味道,有啲牌照未必再批,亦都可能個師傅冇人肯接手,好多後生仔覺得成日對住個爐好辛苦,而作為爸爸佢亦唔想下一代係咁,作為爸爸我都理解,但對食客係個損失,希望個節目紀錄低。」

 

諾懿拍《滿足》時親自去捉魚,發覺海上鮮已難搵。
諾懿拍《滿足》時親自去捉魚,發覺海上鮮已難搵。

 
諾懿認為傳統美食的師傅買少見少,好想紀錄低他們的故事。
諾懿認為傳統美食的師傅買少見少,好想紀錄低他們的故事。

曾想離開TVB

節目只得6集諾懿坦承未夠喉,但要看觀眾反應,「鍾意咪開第二季囉!我相信口碑好,公司會好支持。」他又自爆節目本身有12集,「獎門人(曾志偉)話,你哋咁樣拍法咪下年先出街,攞住6集出街先啦!其實我哋仲有題材喺度,譬如講魚蛋同埋即食麵。」他又透露繼《仨心友行3》後,已向曾生提議了3個新節目,全部已過關,不過就大賣關子不肯講題材,「梗係唔講啦!講咗咪畀人抄!大家差唔多會睇到,但全部同食都冇關係。」
諾懿監製的《仨心友行3》在馬來西亞已播,好快香港有得睇。
諾懿監製的《仨心友行3》在馬來西亞已播,好快香港有得睇。

 
諾懿好支持老友張達倫向外闖,但自己未有特別計劃。
諾懿好支持老友張達倫向外闖,但自己未有特別計劃。

提到老友張達倫最近離巢外闖,諾懿坦承曾經想過離開公司,但做了監製後就打消了念頭,「呢個課題經常喺我哋朋友圈出現,離開TVB去第二度發展,但係呢一、兩年我接觸咗監製崗位後,呢個課題對我已經唔再重要,因為去到邊度,只要你嘅成品、作品係好,邊度都一樣,𠵱家網絡世界好發達,除咗做TVB嘅節目,仲可以做網上嘅嘢,同以前唔同晒。」加上他明白很多際遇自有安排,「我𠵱家41歲更加明白到有啲嘢,唔係自己揀,係人哋安排好咗,好似《疫境廚神》,唔係有疫情,我唔會有得煮嘢食,唔會幫手做監製,有啲嘢冇得plan。」他又坦承很享受現在身兼演員、主持和監製,「幾得意,我可以拍吓劇,又可以做吓主持,又可以做監製,3個範疇3樣唔同嘅嘢。」
諾懿最近參與新劇《婚後事》,他大讚劇本和拍檔賴慰玲都超正。
諾懿最近參與新劇《婚後事》,他大讚劇本和拍檔賴慰玲都超正。

 
諾懿有個好太太李潔瑩照顧屋企,令他可無後顧之憂工作。
諾懿有個好太太李潔瑩照顧屋企,令他可無後顧之憂工作。

 

立即下載 | 全新《星島頭條》APP https://bit.ly/3yLrgYZ

 

其他文章
hd