【#美食獵人】宵夜食乜好？港九新界串燒推介之選

Previous Next

每當深夜時份，街上面少一分喧鬧，人就多一分肚餓，J編作為資深「餓」底，解決宵夜問題點可以唔講究！所以，就等J編推介一下自己嘅宵夜心水選擇，今次就講「串燒」！

首先講講小編最常食嘅串燒檔，位於西灣河嘅沙嗲佬，呢間舖每逢入夜先開門做生意，開到凌晨一點左右。佢嘅價錢都唔算貴，雞肉、牛肉、豬肉等等就$15一串，腸仔、腐皮卷就比較平，$10左右就有成交。呢間鋪好食在每一串串燒都係用炭爐即叫即燒，而且沙嗲醬有大、中、小辣或者唔辣選擇，就算係無辣不歡或者唔食得辣嘅朋友都可以放肆去食。小編就比較鍾意食大辣，因為佢嘅辣味係慢慢滲出嚟，要食完串串燒之後先會喺口入面慢慢感受到辣，之後再飲啖冰凍嘅梳打水，簡直係享受。

同樣喺港島東區，筲箕灣專出美食嘅東大街就有一間印尼沙嗲屋。最特別在於佢居然有飯盒賣，每日都必定售罄嘅印尼黃薑飯，一盒大約四十蚊，無論當午餐定晚餐都算抵食！串燒就有齊基本嘅豬牛羊雞，除此之外仲有燒白鱔，款式非常之多。佢嘅沙嗲汁就比較濃味，而且花生碎都比較大粒，稱得上係沙嗲界嘅重口味之選。

另外，有一間串燒店喺旺角通菜街行人天橋旁邊，旁邊係麥當勞同龍津，舖頭名叫做野火燒。每次小編經過都會買一串燒羊肉，因為佢同我細個食新疆風味烤羊肉串嘅味道非常似，重口味嘅香料同辣粉，再加上羊肉嘅羶味，對嗅覺同味覺雙重刺激。暫時喺香港，小編都未食過其他串燒舖嘅羊肉係有新疆烤羊嘅風味，所以呢間嘅羊肉都算特別。

新界方面嘅選手就有位於元朗嘅串皇同埋荃灣嘅大家姐。先講元朗串皇，佢好打之處係佢獨家嘅辣汁，除咗香之外，真係好辣，但又辣得好過癮，令人辣到爆都仲想encore！不過，食唔到辣嘅朋友就千萬唔好亂試呀！而荃灣嘅大家姐串燒款式就比較少，只有六款，但係沙嗲汁都幾香，花生味濃，而且花生碎都好大粒，適合鍾意花生味濃嘅食客，加上價錢唔貴，大約$12至$14就有一串串燒，算係高性價比。最緊要近地鐵站，又在商場門口位，收工收夜或者行街行夜咗，隨時行去整兩串醫醫肚，就腳又滿足。

文：Jack
圖片來源：Openrice.com , 網上截圖, 印尼沙嗲屋Facebook