【點食得晒!?】Peyoung大盛即食麵究極進化 超超超超超超大盛八倍份量切勿獨食

即食麵生產商丸嘉食品(Maruka Foods)去年推出Peyoung超超超大盛即食麵之後,今年又有新產品推出,直接將「超超超大盛」升級做「超超超超超超大盛」。齋睇字面由3個字「超超超」,加到6個字「超超超超超超」,就知份量究極進化到足足提升兩倍!新產品將會於11月2日喺便利店先行發售,11月16再進行一般發售,暫時未知香港幾時會有。


普通裝嘅Peyoung即食麵重120克,大約有544卡路里,而近年推出最大碗嘅「超超超大盛」就多達2,142卡路里,已經有普通裝嘅四倍。今次推出嘅「超超超超超超大盛」版,就高達4,184卡路里,係「超超超大盛」嘅兩倍,普通裝嘅八倍左右。


當世人依然苦惱緊食唔食得晒「超超超大盛」嘅時候,製造商已經直接將份量打孖上,好似好希望顧客患上即食麵恐懼症。不過製造商都非常佛心,包裝上刻有「切勿獨自進食」嘅溫馨提示,希望客人同其他人分甘同味。又到臨近聖誕節,相信一個Peyoung「超超超超超超大盛」版即食麵已經足夠令一家五口無需食聖誕大餐,小編覺得真係非常抵食,襟食程度不下於鐵罐裝嘉頓雜餅。


撰文:Jack
圖片來源:peyoung.co.jp


hd