【米珠蓮】新記冰室 特濃芝士麵始祖

  說到芝士麵,新記芝士麵相信是不少人的深刻回憶,更是有香港人情懷的Comfort Food,見證着速食文化轉變,以及香港人創意的展現。

  香港人有三大奇食,分別是佐敦的澳牛光速餐、尖沙咀香檳大廈的新記芝士麵,以及星座番茄蛋牛通,未食過好難話自己係香港人。澳牛自置舖位,一向唔擔心經營及加租等問題,常可自設假期休息,早前第四波疫情嚴重時,老闆更決定長休整個月,日前才恢復營業,立即大排長龍;星座及新記因香檳大廈將重建,前者會留守到最後,新記則選擇衝出尖沙咀,之前率先在荃灣開店,一直未有機會試到。上星期機緣巧合,在旺角碰見新記冰室的新店,詢問店員得知,旺角店才剛開業,店舖裝潢刻意採舊式設計,那些摺櫈及階磚,令人聯想起舊香港的情懷。

  坐低立即點了星級推介的芝士豬頸肉煎蛋撈公仔麵,麵上枱時熱辣辣,那泛黃的芝士汁沾滿整個碗面。芝士味極濃郁,是糊口的那種感覺,咬一口豬頸肉,切得尺寸剛好,配芝士汁非常入味,再用湯匙劃開煎蛋,蛋汁混和公仔麵及芝士汁一同吃,隨即回想起當年在香檳大廈第一次拍拖品嚐這個芝士麵的情境呢!接着再點店員及網友推介的蜜汁龍鬚,即滷水墨魚鬚,但只用較尾端部份,上枱時加上蜜汁及芝麻,灼得剛好非常爽口,墨魚鬚掛滿汁,加上甜甜的蜜糖及芝麻香,眨眼已吃清光。飲品較一般,反而見每枱都有點瑞士雞翼,還有餐牌上發現炒通粉幾有特色,下次一定再來試試。

 

地址:九龍旺角砵蘭街185號地下

查詢:2668 0040


(讀者們如有好食推介,歡迎電郵至[email protected]報料,米珠蓮會盡快去試食,做真實食評。)


hd