米珠蓮｜蟹季開鑼！星級酒店推8道菜大閘蟹套餐歎原隻足両江蘇大閘蟹聽埋爵士樂

更新時間：08:00 2022-10-03
發佈時間：08:00 2022-10-03

大閘蟹蟹季來了！食大閘蟹都可以食得有儀態又夠chill。中環美利酒店The Murray藉着10月蟹季，為大家帶來上海大閘蟹宴及爵士樂之夜，在25樓的餐廳Niccolo Room食完大閘蟹，仲可以去埋酒店戶外位置的Cotton Tree Terrace來個爵士樂之夜。

美利酒店The Murray今年推出的8道菜大閘蟹之夜只限定供應4日，由酒店新任命的中菜及宴會部副行政總廚陳忠秋師傅發辦，選用最揀手的新鮮江蘇大閘蟹，炮製出多道大閘蟹時令菜式。招牌菜當然是清蒸原隻江蘇大閘蟹，客人能以最原汁原味方式，細嚐鮮甜十足的清蒸蟹肉、蟹膏。酥炸蟹粉釀蟹蓋，將鮮拆蟹粉、蟹肉釀於蟹蓋中，再沾漿封好炸至金黃酥脆，每一啖都滿載着蟹香。鮮蟹粉竹笙扒菜苗，清甜竹笙與時令蔬菜融合在一起，再加入燴蟹粉增加層次感。除了大閘蟹套餐，Niccolo Room仲有西施海皇燴燕窩、花雕醉乳鴿、飄香荷葉飯、桂花薑茶湯丸等精緻上海菜式提供。想嗒返兩杯？餐廳亦有4款陳年10至20年的女兒紅及花雕酒可供選擇。

美利酒店The Murray的戶外餐廳Cotton Tree Terrace一向受歡迎，10月起舉行戶外爵士音樂會。一班才華洋溢、風格多樣的本地音樂家、樂隊會在Cotton Tree Terrace表演。客人可享用香檳及精選小食，亦可額外點選新鮮出爐pizza、松露薯條、新鮮生蠔等美食。最啱現在深秋時分一邊聽音樂一邊摸杯底。