【MALL樂哥】癲噹×Momo熊 黃埔天地行大運

  2021年剛開始,全新欄目《MALL樂哥》今日橫空出世,首先祝大家今年身體健康、出入平安!活潑好動係我嘅性格,座右銘係「食得好、玩得好,但又要Shop得抵!」雖然疫情仍嚴峻,MALL樂哥仍會遊走全香港各區商場,捐窿捐罅務求為大家搜羅各類好玩、好食、好買資訊,以及如何過好生活的法則。
  黃埔係中產大區,黃埔天地正正係附近泊車最方便商場之一,我同老婆及囡囡泊好車,食過近期人氣的壽司郎(好彩只係排咗一個鐘!),就開始我哋今次打卡之旅。呢個商場嘅新春DECO差不多係最早開放,特色在於癲噹(Din-Dong)聯乘PostPet港日合作!兩個卡通角色一向勁多粉絲,其中一個打卡位,就係黃埔號船尾嘅「彩燈錦『鞠』拱門」,拱門掛滿一個個彩色手鞠,鞠球彩燈具有圓滿祝福的意思,氣氛超好,難怪大家都爭住Selfie,我哋一家都影過不亦樂乎,彷彿感受到這份美滿的福氣呢!
  由船尾行往船頭位置,沿路會見到我認為係重中之重嘅「七福彩虹隧道」,彩色代表無窮生機,穿越七彩分明、燦爛奪目的螢光隧道,隨即沾滿七色福氣,寓意新一年生活如彩虹般絢麗多彩!2020大家辛苦捱咗成年,不妨在此開個靚頭走返轉,攞個采頭。MALL樂哥最大心願係年中或年底疫情消退,大家可以除低口罩報復式去旅行!囡囡最鍾意長頸鹿,我相信今年起碼可以帶佢去曼谷Safari World,而老婆亦可享受佢最愛嘅SPA!
  呢排咁凍嘅天氣,喺戶外玩完梗係要返入室內取暖,順便去聚寶坊睇埋佢哋個「巨型手鞠萬花筒」,癲噹會換上一套至紅醒神拜年服裝,與Momo熊及牛牛一齊邀請大家走進巨型手鞠萬花筒內轉個好運,睇住串串手鞠透過鏡子折射流光溢影,為大家新一年迎來好運。行完打埋卡,做埋泊車優惠,啱啱好攞車打道回府。順帶一提,1月29日起於黃埔天地消費滿$400,仲可以免費換領「花綻‧雲彩慶豐年」利是封一包!


hd