任睇No.1
  • 25º
  • 85%
  • 2024年3月29日 星期五

【MALL樂哥】新城市廣場 應節動樂園

  話說Mall樂哥有兩個囡囡,剛啱大囡(Mall樂姊姊)下星期要回學校考試,Mall樂太要陪佢溫習,我就帶埋細囡(Mall樂妹妹)出去辦年貨兼玩餐飽,免得阻住佢哋兩個啦!近近哋去咗沙田新城市廣場,1期1樓羅馬圓形獻技場正好搞緊與LEGO合辦嘅「Let's Moove新春動樂園」活動,有齊十二生肖造型LEGO公仔,Mall樂妹妹見到咁得意,即刻九秒九衝埋去同啲動物生肖逐隻打卡!來年係牛年,好運紅牛順理成章亦成為活動主角。
  呢個Deco仲設計咗三款至Fit遊戲畀小朋友玩,Mall樂妹妹全部玩齊晒,抗疫期間當做吓運動都好。雖然新春假期林村許願樹圍封,但唔緊要,因為新城市廣場內仲有一棵4米高嘅LEGO版許願樹,方便大家祈福,認真窩心!仲有由丹麥LEGO總部親自操刀、用上約2萬粒LEGO砌成嘅精緻花藝工作台花藝展覽,都非常有特色,難得一見,難怪人人爭住打卡Selfie。
  現場仲有專人派發Coupon,可往位於4樓專門店購買活動展出嘅LEGO套裝,真係一條龍服務。玩完帶Mall樂妹妹試咗商場內新開、來自日本嘅「燒肉Like」一人燒肉,乾淨企理又好食,而且係全港首間分店。辦完年貨,積分剛好足夠用喺《SHKP Malls》App,到Counter換埋一套LEGO十二生肖利是封,順便買外賣畀Mall樂太、Mall樂姊姊,慰勞佢哋辛勤溫習。當然,我哋兩個玩得咁開心就隻字不提啦!


hd