【MALL樂哥】北角匯《貓.美術館》 加碼延展到5月

  Mall樂哥一向鍾意佈置得靚靚嘅商場DECO,有新鮮感又可以打卡呃Like,其中一個Mall樂家族經常去嘅大型商場,係新鴻基旗下嘅北角匯,因為自開幕以來經常有別出心裁嘅商場佈置,其中一次櫻花祭仍然記憶猶新,近期嘅貓貓系列更加冇得頂,大膽講句唔去行吓真係Out到冇朋友!
  《貓.美術館》其實去年11月初已經登陸北角匯,掀起過一片貓奴打卡熱,可惜疫情反覆,多個立體景區都一度要暫時關閉。原定於2月結束嘅《貓.美術館》,據知收到唔少貓奴反映,希望限聚令放寬重開後可以延長開放期,如今喵主子終首肯繼續留港,美術館話會一直開放至5月31日,大家真係要把握機會啦。
  場內特別佈置多個咪景區,踏入「貓藝空間」,貓奴就可欣賞到五幅自文藝復興至二十世紀唔同時期嘅經典之作,透過多組半立體錯覺藝術牆身畫,大家仲可以化身喵畫一份子,拍下萌照。而貓.星夜特別為香港站創作、全球首度亮相嘅作品《貓星夜》,能夠與貓咪一同感受喵城浪漫星空,一齊望向天空數星星。至於「貓視覺畫廊」,就帶你見識唔同時代嘅喵星球藝術史,一次過膜拜61幅複製嘅貓名畫。


hd