辰來之筆｜無暇笑死
發佈時間：03:00 2022-01-18
勢估唔到中國愈來愈幽默，竟然惡搞英國軍情六處，即係007占士邦老東家，今日要同大家分享。
唔好去公眾場所，中環酒館亦提早打烊，唯有上去張翁個Office啦，大家戴住個口罩，飲酒先至可以除。「四個人啫，又唔係成百人，上嚟坐下，飲杯酒又好，飲杯茶都OK，呢啲叫做衞生聚會。」我話，大家瘟咗成兩年，好應該有一個合情合理的地方舒暢身心，張翁有個咁大嘅辦公室，真係益街坊。
大家都有上網睇過由新華社發出之《0.07︰無暇笑死》，搵兩個中國人扮英國MI6王牌特務，對美國CIA單單打打，幾新穎，創意可以畀到八十分。
「安仔，你唔好九唔搭八啦，祖國出品仲有二十分去咗邊？扮到十足，英文都可同銀行偉有得比，我就評九十分，差十分是鼓勵繼續進步。」大師兄，乜今日你戴個透明口罩咁潮，係咪電視台贈品？「辰哥，我就好希望有機構可以請到星爺同張敏拍檔演出嘞，唔使講英文，廣東話更加傳神。」
張翁幫大家沖泡一壺靚普洱，聽講係陳年舊普洱，上環茶莊珍藏，可以增強免疫力，大家飲多幾Round先至飲酒，因為大把時間，唔使趕住食晚飯啦，因為亦無得過你食，返屋企食杯麵，清清哋，唔好要求咁多。
「0.07確係好橋，仲要改個無暇笑死片名，英文係乜話，No Time to Die Laughing呀？」其實香港可以拍國產零點零漆，星爺唔係用華為手機，係用隻皮鞋嗰款，諗下都好笑。「安仔，其實0.07扮到咁行，好容易畀人告你侵犯版權、肖像權。」你就真係九唔搭八，你唔好話侵犯人權，不過，我當然無講出口啦，大家飲茶。
「嗱，陣間攞盒西餅大家食，得半打咋。」夠啦，不過可唔可以要杯咖啡？「英國軍情六處阿頭好有風度，佢無話告人，反而多謝新華社同佢哋免費宣傳。」咦，咁都當幫你宣傳，宣傳咗乜呢？「辰哥，英國情報機構早排話要大量招收識中文同方言之中國籍人士入去軍情六處做嘢，唔知係咪真嘅呢，係就當宣傳，你睇0.07幾有型，0.06呢位女同志亦高雅。」
銀行偉，你食蛋糕啦，九唔搭八，英國係紳士，吃了啞虧都保持風度，幫你宣傳咩，你估新華社有求職廣場？「偉哥高見，佩服佩服，不過英國今非昔比，聽講情報機構都唔係好夠經費，分分鐘要Cut人，仲要話請中國人？」我睇得新聞少，你唔好呃我。
閒話少說飲杯啦
普洱茶最高境界係無茶香，飲落口亦唔覺即時有茶味，係要飲完之後，唞一唞，先至忽然成口甘晒，聽老人家講，呢種係普洱之陳化境界，非有五十年茶齡不可求。「世侄，你都識貨，你講嗰種茶，如果完整一餅，炒到過百萬人仔，仲要市場無供應，我就無本事請大家飲嘞，三十年普洱係仲有少少火，即係澀澀哋。」
「張翁，我都係聽人講，無飲過，過百萬人仔，不如去中山買層三房住宅單位，最近又劈價，新樓有埋裝修。」大師兄話︰「安仔幾時去中山，隔離十四日，返歸又要再隔離十四日，唔係好多日啫。」講開又講，美國西方情報人員已經好難滲透內地，因為周街有CCTV，手機更有追蹤功能，尤其是一二綫城市，人工智能AI設施先進到你唔信，入到去就真係無暇赴死。
「辰哥，𠵱家疫情期間，仲要有健康碼，你話外國特務點死好，乜嘢個人私隱都無。」偉哥，做007要人幫你保護個人私隱，我真係畀你笑死。
食完蛋糕，又話要飲咖啡，大家唔使飲酒？「都話慢慢來，等陣我同大家開支白蘭地，好唔好？」
講開又講，做情報人員會唔會畀MI6拖糧？如果做完任務，打簿見唔到有糧出，咁點算？勞工處如何受理？
「安仔，你用下腦，你可以去搵人權律師幫你討回公道，又或者轉工囉，即係變做無間道。」張翁話︰「呢種題材幾好玩，世侄，你不如寫個搞笑間諜小說，主角因為政府Cut Budget，搞到0.07或者0.06無糧出，然後引發一場雙重間諜戰。」
「張翁，我小說裏面之主人翁係AI機械人阿寶，無糧出無問題。」大家報以噓聲，話我搞爛Gag。
唔好講咁多，張翁喺酒櫃攞出一支名牌白蘭地，好有懷舊Feel，閒話少說，飲杯啦。
