任睇No.1
  • 26º
  • 92%
  • 2022年5月26日 星期四

辰來之筆|又要捱盆菜過年

  今年又係盆菜賀年,不過,大家都感恩了,起碼你可以在市面上買到幾百種不同之盆菜,好多地方超級市場無嘢賣。    
  大家準備過年,難得晏晝可以去中環飲餐茶。「好似無乜收爐氣氛,事關習慣咗與病毒共存,唔使講咁多。」大師兄好少有如此牢騷,係唔係今年又係買即食盆菜返屋企拜年呢?張翁同大家分享私人珍藏之老火鐵觀音,又係上環茶莊送來的。「大家又食盆菜,舊年又食盆菜,不過,你哋唔好講到好似大家又要捱盆菜咁啦,話晒盆菜有鮑魚、燒味,豪華裝有澳洲龍蝦、日本瑤柱同冬菇,當然,有新鮮蘿蔔、芋頭墊底,真係幾好味。」
  銀行偉點咗個臘味煲仔飯,要等足四十五分鐘,所以大家有排傾,不如要多個海鮮湯,一年又過,大家食好啲。「𠵱家食啲點心先,不過唔好點太多,是但蝦餃、燒賣同粉果就得啦。」其實,我細細個都鍾意食盆菜,不過,勢估唔到食到有少少厭。「安仔,無計啦,大灣區都有確診,你估可以返去中山、順德食農家菜咁精采咩!」
  上一次我去深圳食餐好之時,已經不知是何年何月,但記得係去南山高級消費區食四川菜,轉個頭又去光顧城中排隊潮州店之滷水獅頭鵝,想下想下,我好似小飛俠咁,飛去一個時空穿越的世界。
  「食粉果啦,深圳無香港咁靚之手工粉果,中環呢家茶樓係數一數二,唔好諗返轉頭,活在當下先至有幸福。」明白,同意,張翁你老人家新年有乜願望?「我個孫女身在美國上小學,但係已經好耐無返學,成日在家中網上學習,佢同我講好掛念班同學。」大師兄話,香港咪一樣,「想當年,我同安仔嗰個年代讀小學,成日最恨打八號風球唔使返學,我哋呢種心態,相信細路仔唔會明白。」
  係啦,打風最開心,成家人開罐頭食飯不知幾開心,點解呢,罐頭有乜好食?「世侄,因為你平時好少食,少食多滋味。」係囉,如果出年大家又係食盆菜,咁又點呢?我忽然覺得人生都幾無聊,吓哇!「辰哥,我朋友個女𠵱家在英國讀大學一年級,佢同大家講,點解香港咁嘅,有咁多限制,英國嗰邊已經當新冠係流行性感冒,大家如常過日,好多同學仔都偷雞唔戴口罩啦!」
無你咁好氣
  大師兄話,英國又點同中國香港。「好啦好啦,不如叫碟清炒豆苗,好快就有煲仔飯食。」大師兄就講得啱,歐洲人相信抗疫要順其自然,你知唔知,好多人認為感染咗新冠,體內就有自然抗體,好過打兩針。係?有咁嘅事,偉哥你個世侄女咪好危險?好信唔信,佢特登唔戴口罩博中招,結果可以好嚴重。
  海鮮湯先到,無問題啦,大家飲湯先,不過最緊要留番少少湯,等陣用嚟浸飯焦。「講時講,中國古時醫學理論係平時識得調養身體,增強免疫力,一旦有疫情時可以將病情減到最輕,西方人就唔怕死,就算幾百年來經歷過幾次瘟疫大流行,佢哋相信只係一場物競天擇之人類淘汰賽,可以留低就係物種優越,中招唔死得有一樣好處,就係自身有免疫力之餘,都可以有DNA遺傳畀後代。」
  嘩,飯蓋一打開,臘味濃香四散,成個人精神晒。「張翁,我最懷念係食金銀膶,鴨肝加嚿肥豬肉,簡直係天作之合。」部長行過聽到,佢話𠵱家好難有呢味嘢,可能返去廣州老式茶樓至有供應。「有排都返唔到廣州啦,世侄你唔怕肥膩,食多件臘肉當擁有。」
  講開又講,大師兄好似上堂講書咁話︰「幾百年前,西班牙人百幾人打低秘魯印加帝國,主因唔係好打得咁簡單,係西方班人自帶流行病毒,當地人無免疫力,大批土人病倒,於是不戰而敗。」原來係咁,唔怪得之西方人相信確診係好東西,唔病過就無咁好打。不過,今時唔同往日,𠵱家係現代城市化,人口咁密,公共醫療又如此昂貴,你唔係話當新冠無到咁話?「大家唔好研究歷史,食多碗飯保下暖。」
  我其實想講,有歐美科學權威雜誌發表報告,奧密克戎變種病毒有嚴重後遺症,將影響男性雄風,連重要器官都可能變小,唔通歐美人士無所謂?大佬,會傳到後代噃!
  算啦,人哋嘅事唔好理,都費事教精佢,係時候浸飯焦,食完出去散下步,無你咁好氣。
 


hd