辰來之筆｜喜劇之王
發佈時間：17:45 2022-03-01
今天又是宇宙的交流，大家回到中環的茶樓，我和幾位老友又展開中午的閒談，不過蝦餃、燒賣自備，我還要飲用普通的中式茶包。
大家好似有點自嘲自諷，銀行偉選擇WFH，即是家中工作，費事回到公司日日多自我核酸檢測。「下次不如將網上見面的場景設計成為樓下的運動場啦。」唔明，大師兄，你想大家打籃球定足球，你好想虛擬運動？點解唔設計成冬奧滑雪場，你用「小蘇神」做虛擬化身出場又如何？「安仔，你都九唔搭八，你扮谷愛凌好唔好，一千六百二十度轉體。」張翁用茶博士虛擬化身出現，佢話今日服務大家咁話。「張翁，你有無快速檢測包派呀？酒樓阿姐依家化身抗疫大使，你不如都支持下啦。」
乜嘢叫做苦中作樂，莫過於此。我叮好一盒蝦餃，熱騰騰，唔知好唔好味，事關我好少食用這種微波爐美食。講開又講，大師兄叫大家下次去運動場見，唔通預設大家排隊落街接受檢測，你都好幽默噃。「大家唔好咁灰啦，嗱，我頭先食咗件叮叮蝦餃，OK啦，等陣去超市買多一打返屋企，你知啦，有備無患，點知幾時要喺屋企等運到呢？
銀行偉如常用本尊化身出場，西裝整齊好有銀行家風範，佢話等陣要越洋開視像會議，事關近日國際幾波動，全世界都要睇實個市。大家都知歐洲有個國家由一位喜劇演員做總統，於是乎搞到周圍立立亂，兼且局勢緊張。「你話嗰位總統係喜劇之王，定係英國首相約翰遜呢？論外形，約翰遜似多啲。」
香港有一位名副其實的喜劇之王，佢就係周星馳，比歐洲嗰位總統喜劇之王靚仔好多。「講開又講，由舊年年初講到最近都話歐洲會爆發衝突，英國首相仲要話有世界大戰危機，你哋點睇？」張翁叫大家飲杯茶食個包先。Sorry，我無買包，食件曲其餅啦。
「大家睇唔睇到新聞講，俄羅斯總統晒出紅色公事包，即係總統核彈遙控掣，你話係喜劇定係科幻電影。」大師兄話，可能會係下一步飛虎電視劇之新題材，你知啦，香港飛虎隊愈玩愈大，愈玩愈國際化，有朝一日，玩到身負制止世界核戰大任都有份。
「我說話玩穿越明朝好玩，三個男臣幫助香港抗疫，有請李時珍出場，同大家講解中醫理論，既有娛樂性又有知識性，好合時宜。」大師話，依家開拍都趕得切？「我唔敢作不負責之預測，抗疫幾時勝利完成，全世界無專家可以講到實，不過，總之呢個場景都會好熱門，如果唔拍劇不如寫小說，我去籌劃一下。不過，飲完茶先。」
喜劇演員多數都係人生悲觀者，好似好多成功明星都咁講，我就唔係幾明，大師兄有無可以同大家分享嘅地方？「安仔，日日氹人開心好辛苦，你知唔知，你笑人唔笑，仲要話你劇屎，確實係天大壓力，何況，人生有幾好笑？你就學人寫科幻小說，無厘頭當幻想，作為一個喜劇之王係唔可以的。」明白，你可能成日要氹阿嫂開心，所以有感而發，不過我唔會講出聲，無謂破壞元宇宙氣氛。
「前半生做喜劇演員，跟住又要當三煞位之總統職位，可能係三生修來之悲劇，事關你為世人要背負天下最大的壓力，人唔癲都算你EQ高，所以我以同情之心看待呢位歐洲總統。」其實，好多人曾經忽發其想，若要由最多市民支持之人物做特首，搵星爺捱義氣得唔得？「安仔，特區現實生活中，已經有好多喜劇演員，你飲杯茶諗下，係唔係？」唔使飲杯啦，你一講，我腦海中馬上浮現出成打現實之喜劇演員，好多係搞笑過星爺，又無厘頭過星爺。「所以話，世侄，如果要星爺出山，你估無競爭咩，競爭好劇烈呀，你都真係好天真好傻。」
我其實都有少少懷疑自己係咪傻，因為前兩年無得去旅行，返大灣區都好麻煩，今時今日，連街都唔想去，隨時要留喺屋企食杯麵，食叮叮點心，我想講我好悶，不過，無謂破壞大家網上相聚之雅興。「大家今晚食乜餸？」原來都係捱罐頭，唔好講，我想起午餐肉都想喊，依家最好係食豆豉鯪魚。
「安仔，不如搞搞新意思，去網購全港即食麵，食足七日，天天不同款，拍成視頻擺上網，扮下網紅。」大師兄，你真係喜劇之王，咁好笑嘅嘢都畀你諗到，你做先啦。
文：李辰安
更多第5波疫情資訊，請到以下專頁瀏覽（按此）
立即下載｜全新《星島頭條》APP：https://bit.ly/3yLrgYZ
