李辰安 - 鐵金剛勇闖南海｜辰來之筆
發佈時間：03:00 2022-06-28
上世紀《魂斷藍橋》是一部可歌可泣的愛情電影，不幸的是香港上演了「魂斷南海」的現代悲劇，確是令我心碎了。
最近全民熱搜「珍寶海鮮舫」一詞，事緣珍寶海鮮舫日前在移離香港途中，駛至南海西沙群島附近水域時，遇上風浪，海鮮舫全面入水傾覆。「安仔，你上個星期都好似有預感咁噃。」大師兄，何有此言，我又唔係玄學家，都你同你一樣係食叉燒包之凡人，我何來預感？當時我只有少許傷感，事關香港又少了一件集體回憶。
大家又齊集中環飲茶食飯，今日工作並不忙碌，主要都係有啲緊急但唔係重要之瑣碎事務，反正長做長有，三點幾返Office都無所謂。「世侄，我都記得你上次飲茶同珍寶海鮮舫講Bye Bye，係咪？」原來如此，大師兄幫銀行偉作補充︰「你話再見，即係後回有期，終有一日有緣再見，但係你用洋化之Bye Bye，老人家話，無再見之意，好可能是一別再無可敘。「啊，原來香港話咁精深博大，我都要戒同大家講Bye Bye。」你囉，香港人禮貌上同人講「得閒搵你飲茶」，或者話「再約你飲茶啦」係有頭有尾之吉祥話。
「其實我都唔記得有講過同海鮮舫講Bye Bye，大師兄真係胸懷千萬里，心事細如絲。不過，大家都係點下有乜好食。」不如蒸條十二両之斑仔，當係對海鮮舫之回憶，其實食新鮮大龍蝦先至應景，不過，無謂飲茶飲到幾千銀埋單啦。「今次真係Bye Bye，新聞引述集團表示，海鮮舫行駛至南海西沙群島附近水域時，船身入水開始傾側，負責航程的拖船經過嘗試救援後不果，海鮮舫最終全面入水翻轉。 」我其實想說，呢一隻充滿中國王朝色彩的海鮮舫，可以有無限小說想像空間。
老闆過嚟交帶條斑仔已經上水，係咪即時蒸咗佢，定係大家食下點心，飲啖茶先。「無所講，炒碟菜最好，隨時可以上魚。」張翁吩咐過後，就問我有乜小說想像空間，大師兄插句嘴︰「嘥氣啦，成日講寫小說，你見佢幾時成書？」我想講，小說不是一日煉成的，講下講下就可以成事，慢工出細貨，最緊要唔好急。「不過要快吖嘛，安仔，食件山竹牛肉先至講啦。」
珍寶海鮮舫係好有神秘感，因為多年以來招呼過好多王室貴族國際猛人，氣場好犀利，其中必有一啲密碼深藏在內，例如有人將預言未來世界大事之密碼藏於海解舫某處，由於天機不可泄露，所以忽然發生離奇事故。大家等緊條魚，好似對我話題無乜興趣，算把啦，我都係慳番啖氣，叫個揚州炒飯打個底先。
「安仔，你不如寫個國際間諜小說，007成百歲應該唔會再收任務，你就作一個0.07啦，佢奉命來港調查海鮮舫之驚世秘密。」都幾有趣，不過，我覺得小說中之0.07唔好再係好似辛康納利咁嘅款，突破少少，造型要係一頭梳極唔服之金髮中年人。「即係英國現任首相約翰遜咁。」大師兄一個唔該挾起個魚頭過去，眼尾都無望我。
銀行偉話︰「如果呢個造型之現代鐵金剛，邦女郎都要作出適度調整，同埋微調配合先至得。」偉哥，你即係想點，你想詼諧我呀？「安仔，偉哥好正經，邊似你經常九唔搭八，如果你個鐵金剛神似大英首相，身邊出現成班好似茱莉·安德絲之尤物，咁睇成個畫面係咪好奇怪。「張翁，你有無意見？」
嚟啦嚟啦，食碗炒飯先。「世侄，咁嘅款之現代鐵金剛，最好係用金髮大媽當邦女郎啦，一齊去跳廣場舞一邊去挖料，畫風十分調和。」張翁，你好似玩我咁噃。大媽加大叔，寫出嚟都畀書商退稿啦，吓哇。「無問題啫，你都未寫得成，十畫未有一撇。」
其實我想安排一幕0.07乘坐英國家傳之寶，單天至尊之伊利沙伯女皇號航空母艦駛過去南海。「嘩，題材好敏感，你想寫乜？」有問題咩，行國際水域自由通道係無公害進入，唔好大驚小怪。「安仔，你想寫0.07勇闖南海，找尋海鮮舫之秘密？」其實半個世紀之前《鐵金剛勇戰魔鬼黨》都有一幕水中大戰。「係，套戲第一個出場之邦女郎正是茱莉·安德絲。」不過，張翁欲言又止︰「世侄，依家係AI時代，倒不如派AI機械人去啦。」大師兄同我收場︰「好啦，你寫個大英帝國AI特務去南海搵驚天秘密之故事，下個星期再講。」又好，咁依家食個包先。
