李辰安 - 我其實好怕熱,又驚無電|辰來之筆

更新時間:03:00 2022-07-05
發佈時間:03:00 2022-07-05

今日無落雨,但係熱到飛起,我忽然感到清涼,咦,你有中暑現象呀?暈暈地乎。非也,我忽然覺得好幸福。
  夏天晏晝好熱係香港常態,作為土生土長香港人,無理由怕熱。「安仔,你都無穿西裝打呔啦,仲有腳踏休閒鞋,成個明星咁款,都呻熱,你不如移民好過。」是日又係四個老友去飲茶,我入到茶樓成個人爽晒,因為冷氣充足。「世侄,呢度係中環,供電正常,你唔使擔驚受怕,唔會無燈無冷氣。」張翁今日好醒神,一身運動裝,係囉,老闆階層唔使點做,話唔定飲完茶去西貢打高爾夫球,又或成班有錢朋友遊船河。
  「辰哥,你早排去咗元朗酒店Staycation咩,撞正大停電,所以有感而發,係咪呢?」我食緊鴨腳扎,所以唔得閒應佢,容乜易哽親。大師兄見我無反應,於是搵嘢講︰「我阿爸以前返工,由於喺尖沙嘴打寫字樓工,所以日日都要成套老西,夏天時節我做小學雞,一身短衫短褲,但見阿爸如此辛苦,我好感動,返學校作文寫我的爸爸,提到爸爸着住西裝搵食好偉大,點知畀老師批評一頓,話我九唔搭八。」
  原來大師兄咁鍾意話人九唔搭八,原來係有創傷歷史,明晒。「當年要讚爸爸偉大一般係好口號式,好教條化,你阿爸着西裝返工喺當年可能是代表一種階級優越,事關做白領係筍工,如果你話阿爸牛記笠記去荃灣工廠返工,日日做足十個鐘,全廠無冷氣,咁就真係偉大。」係囉,大師兄,你真係九唔搭八,仲要喺細細個都已經如是。不過,我無講出口,繼續食我嘅鴨掌。
  張翁又講︰「當年中環個個都着到好標準,事關我後生之年,係英國人幾輝煌年代,中環之達官貴人大商家,全部都百分百英倫打扮,做紳士要抵得熱,仲要扮到神色自若,我伯爺就好在意我打扮,同時又要練好啲英文,總之要做到成個英國人咁。」
  不過,話時話,如果你好有型又好有權威,身穿長衫更加巴閉,例如當年何東爵士就是如此中國式打扮,其他跟佢一樣風格的中國人,亦係德高望重之輩。「當然,那些年中環更多人係穿唐裝,即係李小龍唐山大兄之打扮,呢班瀟灑哥主要唔係中環銀行區出入,全部集中在中上環三角碼頭。」我幾乎畀張翁呢一句哽親,都係食燒賣、山竹牛肉。
  「不如叫個荷葉飯啦,咁熱天時,食下點心都夠啦。」無問題,我之所以覺得香港好幸福而唔係辛苦,原因係有位中環老友,要調去德國總公司幾個月,由於德國同佢老表俄羅斯唔妥,今個冬天可能無Gas。「嘩,係好大鑊,德國早排話擔心呢個冬天好難過,一早叫國民着多幾件冷衫,又話少啲用電,聽講煲水最好燒柴。」
  銀行偉補充,除德國好愁外,成個歐洲都騰晒雞。「你唔好以為依家炎炎夏天,大家享受陽光與海灘,歐洲已經為即將來臨之冬天愁。」我其實想講,有位世侄最近喺英國返港過暑假,講到房東下令唔好開空調,搞到鬼咁熱,好唔習慣。「我忽然想像香港如果好似大英帝國咁,唔夠電點算?老闆唔開空調又要大家唔好Work from home,一齊在Office搖扇子開工,我暈喇。」
  我同大家講,幸福不是必然,所以日子過得好要識得感恩,如果我身在歐洲,除咗好似有人話,呢度空氣係自由啲之外,其餘乏善可陳,我不如留喺香港歎冷氣,與此同時,香港冬天唔使開暖氣,大家打邊爐足夠驅寒。「張翁,上世紀八十年代,我同大師兄喺鄉下讀大學之時,好多人計畫移民,不過當時有個廣告為移民風作反宣傳,廣告係話,香港乜嘢都有,我點捨得走。」
  「世侄,我身同感受,幾十年前好多人都去美加移民,落籍當地買個保險,又返香港生活,其實都係兜兜轉轉,如果你家有恆產唔使做,無問題,過去買下樓,玩幾年你依然好有錢,如果有銀行經理你唔做,去美加做基層工人,咁就好唔抵。」
  大家不如食荷葉飯啦,唔好講咁多,更加唔好講以前,食完飯,一人一客杏仁糖水,咁就Very good。「安仔,你會唔會去英國?」大師兄,你都九唔搭八,問啲咁奇怪嘅嘢,我年尾準備返大灣區考察,睇啱就買個千呎單位等退休。好啦,叫糖水。