任睇No.1
  • 29º
  • 76%
  • 2022年10月6日 星期四

李辰安 - 不要表錯七日情|辰來之筆

睇嚟香港好快逐步正常通關,聞說香港往倫敦的經濟客位機票飆升兩倍有多,而且一票難求,其實,我忽然好想去英國。
  今日幾得閒,成個人有假日情緒,原因憧憬好快自由出入,唔使隔離,到時真係要諗下幾時返鄉下。「安仔,你返鄉下使乜坐飛機?搭高鐵都唔使啦,過咗關打的都OK,你返邊度鄉下,唔通學人去日本旅行?」一班老友又在中環茶樓食蝦餃、燒賣,享受夏秋之間嘅閒情。補充一句,日本唔係我鄉下。
  日本,好難高攀啦,你知唔知日本執政自民黨開會,佢哋準備打造「Luxury觀光」計畫,即係要重點招呼有錢人去日本旅行,原因過去幾年日本旅遊觀光被新冠疫情打亂,業界人士食穀種度日,眼見新冠疫情有慢慢減退迹象,於是密謀食大茶飯,打開門口迎接全球富裕階層去日本。
  張翁鍾情乾蒸牛肉燒賣,佢話呢家茶樓有一味陳皮蒸牛肉餅,問大家有無興趣,我心諗,食完乾蒸牛肉燒賣,又食牛肉餅,你話呢?「好唔好叫多味菜遠炒牛肉,咁就成Set牛肉主題。」大家無意見,我想多口話要中式牛柳,不過怕畀人鬧,於是收口,並即時做出一個笑口表情,表示贊同咁解。
  「其實日本上世紀八十年代已經話要做富人俱樂部,呢一個係好大之產業。」我有印象係日本管理大師大前研一講過,乜原來佢唔係第一個人有此意見?大師兄解釋︰「當時日本仲係發緊Japan as number one之大夢,這是日本經濟最高峰時期,有日本學者認為,日本已經好犀利,要爭取再創高峰,已經唔係在於汽車製造、電子產品,事關已經無敵吖嘛。」銀行偉忽然舉手發言︰「當時我未入行,但聽前輩講之前十年八年嘅日本人真係好有錢,普通經理階層都已經係高爾夫球準職業水平,佢哋食好、住好、着好,同埋成日去打波,真係唔知乜嘢係愁。」
  所以日本學者就認為不如反璞歸真,將日本打造成最有品味之生態文明國家,一來國民可以過日子,同時吸引其他富裕階層移居日本。「日本呢一招就係吸金,有錢人去日本住必然會高消費,日日浸溫泉同打高爾夫球,然後食日本至貴至正之料理。」日本上世紀八十年代未爆煲前,設想自己會率先跑出一個新境界,嗱,我忽然想起星爺喺電影《龍的傳人》同梁家仁講︰「我咁後生,就已經去到人生最高的境界,跟住落嚟,除了結束自己嘅生命之外,怕且都無路可行!」
  大家食點心不忘講月餅,問大家今年有乜心水,我就話︰「都係食至傳統嘅蓮蓉月餅,大大隻先至似過節,唔好搞到不中不西,好似食High Tea咁。」張翁話︰「日本真係怕無乜路可行,所以好介意自己旅遊資源被賤賣。」點解?不如大家試下呢碟啱啱上之陳皮蒸牛肉先喇,懷舊菜呀!
  上網瀏覽關於日本旅遊新策略之新聞,原來日本主政者認為好多人去日本旅行唔係好事,要賺旅遊錢不如要少數有質素之好客。日本旅遊代表同官廳人員講︰「花五十萬日圓的人也好,花一億日圓的人也好,去到日本不管在哪兒都必須一樣排隊。要是需要排隊,大富豪就不會來。」
  我都唔使張翁解釋都知,大家唔好表錯七日情,你以為儲埋幾日大假加埋公眾假期,大大聲同人講︰「我返鄉下玩一個禮拜,有無嘢想我幫你買?」係好威水,你知唔知,日本當地人就係怕咗你哋,花得嗰幾萬,再Cheap啲,人均使費一萬幾千,我當你係人民幣咁話,使得幾多?但你搞到周圍景點排隊,食嘢又人山人海,就唔該香港人,你不如真係返自己鄉下。
  張翁同大家計數,日本人要消費成億日圓之有錢人貴客,銀行偉搭嘴︰「大概人均費五百零萬港紙。」吓,你要我去日本使幾百萬,咁去日本買小單位投資算唔算?
  表錯七日情好大件事,有朝一日,大家去到日本受到冷待點好呢?你知香港人好講公平同自由,去到先知道被人歧視,返到香港恐怕有心靈創傷後遺症。「陳皮蒸牛肉如何?」我心諗,好似係食一碟大嘅山竹牛肉,我只可以話︰「幾得意噃。」講回鄉下旅行,最近好多人去英國,對於一些朋友而言,英國先至係鄉下,因為有BNO嘛,英國唔使戴口罩,幾自由方便,如果通關,我想去英國探老友。日本,你去啦。


hd