生活小幫手|實用App幫手搵廁所行山定位 發求救訊號

Headlife
更新時間:18:04 2022-08-16
發佈時間:18:04 2022-08-16

正所謂「人有三急」,好需要搵個廁所嘅時候就會突然腦殘唔知點算,原來今時今日有好多工具App設計咗出嚟,幫到好大嘅忙,例如以下幾個App就夠晒實用,一App旁手隨時救一命。

「Toilet Rush衝廁」︰搵廁所App幫你定位,會話你知附近最近嘅公廁位置,而且會顯示係男廁定女廁,有冇殘廁,有冇廁紙提供,有冇淋浴設備及嬰兒設備,係咪公共洗手間等等。雖然有朋友話,如今去搵公廁倒不如衝入商場更加快,不過好多舊區唔係話咁多商場,又或者某啲商場好似迷宮一樣好難搵廁所,所以有App點都幫到下。

「MyMapHK」︰最勁嘅位係由地政署去研發,方便快捷地查閱由地政總署測繪處提供的數碼地圖。當中有六大選項,包括咗香港街道圖,細緻又精準,連門牌號碼都有,選擇交通狀況亦會立即知道有冇塞車等,而想量度兩地點之間的距離亦可立即拉綫搵到。另一實用的選項就係「遠足」,內置咗香港各大主要的行山路綫,資訊詳盡,又有圖片又有scale,仲有埋標高柱資料,一定唔怕迷路。另外仲有一項叫「Emergency」就好勁,點擊即幫你傳送出SOS Message,包括用SMS/Whatsapp等方式,內有你目前的GPS資料,萬無一失。

「eSeaGo」就係海事處海道測量部,所提供嘅海圖資訊,最勁嘅地方係可以响離線模式之下使用,配合返你移動設備的定位功能,協助响香港水域內行駛。所以好多船家都有呢個App,至於我哋一般市民用得最多就係潛水員,如果出海玩就可以大約知道下潛位置,大概有幾多米水深。另外,eSeaGo使用者仲可以設定自定圖層、航線點及興趣點,如果經常出海到附近海域玩,就有備用數據,分享俾朋友或自用都唔錯㗎。

立即下載 |全新《星島頭條》APP