任睇No.1
  • 31º
  • 69%
  • 2022年9月26日 星期一

潛水|香港潛水清過澳洲 菲律賓 咩係大藍水?黃金檔期係幾時?

好癲呀!點解小編身邊個個潛水發燒友,最近都係咁POST啲清過魚缸嘅靚相去Facebook同IG㗎!真係令人羡慕又妒忌!點解我要坐响公司對住個電腦,你話,公平咩?

小編深信好多朋友都同樣有呢個感覺,而為了令大家睇相又睇得好過啲,小編今次攞咗天堂潛水員Jason最近拍攝嘅海底靚景俾大家睇,事實上,每年,係每年。。。啲潛水界別嘅老師傅都同小編講,冇呃你,全年最清嗰幾日就係農曆八月十五中秋節,結果上年、前年,都唔係正日最清,不過的確係前後大約一、兩星期,海水突然清澈了。至於今年更加係令人喜出望外,唔簡單中秋前幾日開始清,一直到呢個星期都仲係高清,媲美外國潛水,能見度足足十幾米,亦係大家鍾意講嘅用語:「大藍水」。

用一個比較邏輯性嘅推理去理解,點解中秋時節水特別清呢?應該就同水流改變及月球引力有關係。夏季我哋主要嘅水流係被珠三角區域影響,而冬季就會轉為海洋洋流,農曆八月中秋開始就已有轉變。另外,月球引力引起大潮,水漲湧入港口,清水都係外來嘅,咁就解釋到點解會咁清澈。加上呢兩年香港水質的確係因為新冠疫情而減少咗工廠污染物,正面帶嚟可見的影響力。

至於Jason亦有問過船家們,綜合嘅結論都係同水流改變有關,佢哋一般認為農曆七、八月會帶嚟一啲由菲律賓過境嘅清水,但又並唔係每年都同一時間,只係剛巧今年正值夾得剛剛好。就好似近日出船去七星排呢個潛點,平常都要等風平浪靜先去得到,水流好急,未必次次成功出發,但遇上今年中秋清水兼浪靜,就係百年難得一遇啦。

圖片提供:天堂潛水員(https://www.instagram.com/paradisediverhk/

《星島頭條》APP經已推出最新版本,請立即更新,瀏覽更精彩內容:https://bit.ly/3yLrgYZ

標籤: 潛水 香港

hd