李辰安 - 歲月流聲|辰來之筆

我是電視機前時代的人,最近睇到大台之歷史檔案節目,所有回憶返晒嚟,今日天王逐個捉,令我有如坐上了穿梭機。
  秋天終於來了,我說秋天的感覺回來了,早排熱到透不到氣,成日話有超級颱風接近,結果帶來低氣壓,香港變成熱港、悶港。「安仔,唔好呻咁多,今日大家暢飲法國紅酒,慢慢享受人生。」又嚟到中環小酒館,講開陪伴大家五十幾年之大台,重睇過往經典節目回顧,先知道某年某月某天王巨星,原來係某個節目做人肉布景板,又得知天王、天后細細個樣乜咁鬼薯,真係恍如隔世。
  我好多年前捧過活地亞倫場,睇佢嗰部大作《歲月流聲》(見圖),英文係《Radio Days》,大家有印象無?「世侄,我係電台時代長大,你就係電視台一代,差咗一個世代。」雖然如此,我當時睇到活地阿倫之敘事能力,簡直佩服到五體投地,無綫電改變阿倫之童年,唔知張翁又如何?
  「當年聽歌最緊要,尤其是歐西流行歌曲,黃昏五點左右有個節目,是我全日精神食糧,至於空中廣播劇都係好吸引,食完飯夜晚黑就有好多精采選擇,不同台有不同王牌,不過,內容就無乜記憶。」我係撈電視汁長大的,睇大台之檔案節目,原來當年係好有競爭氣氛,跑得出之演藝名人都唔係少嘢。「好似星爺,我係佢兒童節目之鐵粉,當時我都係大學生啦,其實好有衝動上去佢節目,可以近距離用塊紙板同在場小朋友互動。」
  一講電視台,大家都不愁無話題,但我深深品嘗這杯紅酒之後,忽然有一啲神傷之感,此情何來?「大師兄同我當年喺宿舍,同一班師兄弟都係擁發達台,唔多Like大台,因為睇發達台自覺好前衞,唔似班女生咁,掛着睇華仔扮督察。」大師兄都仲記得,當年有位高級督察暫時停職過嚟大學讀書,佢話點解有真嘅督察無人識欣賞?
  「佢真係風趣,督察同華仔比,我唔知講乜好。」大家飲呢支法國紅酒,性價比一流,如果煲劇更加一流,可以飲足成支,然後天光前瞓覺。講開發達台,當年有位徐大俠係我哋偶像,因為佢好似仲型過華仔,與此同時,發達台之武俠劇集部部經典,如果今晚要煲劇,我必選徐大俠之代表作。
  歲月如歌,唱唱下又幾十年了,今時今日有種電視劇種叫國劇,我好少欣賞,唔知點解,我感覺與自己格格不入,反而之前台灣劇集,我比較有喜歡之作,可能年紀問題,睇台劇時,人比較後生,今時今日好多事物對我而言,唔係咁有新鮮感同好奇。
  當日睇「F屎」,心裏有團火,見到杉菜有微妙的觸動,依家見到「神仙姐姐」之國劇演出,我可以講句︰「嘩,睇你面部表情就夠啦,來來去去三、四個表情,之不過,佢後邊班演員個個好專業,演技無可挑剔,但我唔係好慣呢種女一表現,不過,人靚就唔需要講道理。」
  「世侄,你話退休返大灣區住,依家最好習慣一下內地娛樂,神仙姐姐你都喺度指指點點,說三道四,以後你返大灣區睇書啦,好唔好。」其實我無撈電視汁好耐,以前都有鋪癮去錄影心儀劇集,搞到成屋都係錄影帶,不過有咗互聯網之後,我反而睇經典影視之短視頻,原來咁樣睇又有不同欣賞角度,好多著名場面變成我不斷翻睇之娛樂。
  銀行偉依家睇Netflix,所以大家無乜交流,佢話︰「細個睇電視,最鍾意係睇大力水手。」有無睇叮噹、Q太郎,仲有小生?「安仔你最鍾意係睇大力水手,因為有個大力水手女朋友好似你嗰個校花咁樣。」大師兄,你唔好屈我,嗰個校花係你「飛佛」,成日去圖書館想撞人,你估我唔知,不過,你又唔係布魯圖,人家點會睇得你上眼?於是嗰個校花畀一個好Man之男生追到手,你去圖書館憑弔啦。
  大家開開心心又飲到差唔多,最後講到佳麗選舉,之前好着重一人一票,其實用民意選靚女好似離開正題,不過,當時香港氣氛如是,亦唔怪得電視台,其實如果要追潮流,我覺得可以取消泳衣秀,改為穿中國民族服裝,中國有五十幾個民族,各有特色,一來唔怕畀人批評,二則唔怕凍病參賽者,大家諗諗,我哋一行四人食晚飯啦。


hd