李辰安 - 睇完世界盃去旅行？｜辰來之筆
發佈時間：03:00 2022-12-06
大家都話，睇完世界盃就買機票出去旅行，人生又返晒嚟，你問我有乜計畫？我想馬上飛去八十日環遊世界。
今日又係飲茶，你問我睇完世界盃有乜打算，我好奇怪問番你轉頭︰「我唔係C朗，又唔係美斯，使乜等個世界盃啫，明天可以起行，有手機就可以收睇所有賽事，唔使我踢哇？」成班人研究蒸條杉斑好，還是黑瓜子更抵食，因為老闆話早啲清貨，事關平日好多人掛住睇世界盃，劈價賣海鮮，大家一定要支持。「杉斑肉質細滑。」張翁又話︰「黑瓜子有口感，肉質無咁碎。」大家揀來揀去，好似選美咁。老闆提供意見，黑瓜子啦，價錢又相宜。
解決一個好難解決的海鮮問題之後，大家言歸正傳，清大假最好去邊？「日本是熱門之選，不過，因為太熱門，所以機票好貴，人又多，不如去泰國玩幾日。」銀行偉就話要去馬來西亞，玩下潛水，同時可以食下當地海鮮。「我就無乜心水，求其是但啦，不過，點都要出門行一行，費事畀人笑啦，個個去旅行，你仲喺屋企，搞邊科？」
「其實，去台灣都OK，因為好耐無去，好掛住台北市牛肉麵，又想去浸溫泉，幾好呀。」台灣係有一定吸引力，香港無當地之小確幸生活氣氛，去台灣可以扮文青扮幾日，飲手沖咖啡，去誠品睇下有無文青靚女。「安仔，你都九唔搭八，你成個肉類分解員咁氣質，文青靚女又點會同你有共鳴？」你即係話我係豬肉佬，咁又點？我就係好似星爺之豬肉佬外形同氣質，得閒飲杯馬天尼。
「世侄，台灣好Hea好Chill，你真係有品味，日本太熱門啦，個個都話去，不如去寶島休息下啦。」
是日有海鮮，所以點心唔使叫太多，食個包就可以，不如再加多個招牌燒腩仔，幾好配搭噃。但係我又想食山竹牛肉，會唔會多咗？「是但啦，叫多個薑粒芥蘭都OK。」台灣牛肉麵有幾好味？香港無得食咩？「大師兄之前同我遊寶島，佢睇乜乜周刊介紹，話桃源街有家無大招牌之牛肉麵最正，點知我同佢唔識路，搵錯隔籬，食到好勞氣，咁嘅水準喺香港茶餐廳都不如。」
銀行偉知道我講邊一家，佢話︰「呢家叫老王記，你哋又點會去錯隔籬？唔通跟住個文青靚女上咗去。」我都無你咁好氣，後來去到呢家天下聞名之牛肉麵店，首先麵好得，因為係大爐灶炮製，寧舍不同，最好清燉，原汁原味，我可以一次食兩碗。「香港做麵只可做廣東麵，去到北方之拉麵，無咁大個爐火唔會好食。」不過，又有人同我拗，話永康街嘅牛肉麵先至係好嘢。
講開又講，台北市除咗牛肉麵之外，打邊爐都好掂，不過，你要食得辣先可以，因為麻辣口味，紅油飄飄，一般廣東人好難頂得住。「好啦，食埋點心，好快上條魚，大家要多謝老闆割價傾銷益大家。」老闆問今屆世界盃有乜心水，邊個可以捧走大力神盃。「最熱都係巴西，所以你可以買些少，當作娛樂。」日前見到大哨同卡洛斯坐在VIP席捧巴西場，一晃之間，原來過咗幾十年，見到大哨成個老闆咁款，後生仔好難想像佢後生之威武形象，一個過三個，龍門都畀佢過埋，所以有外星人之稱號，卡洛斯更加得人驚，四十碼自由球，一腳就轟入龍門，無人敢用血肉之軀遮擋，真係前無古人。
「見番幾位昔日世界盃冠軍球星，我有預感巴西可以捧盃。」大師兄係都要窒住晒︰「足球係圓嘅，巴西可以輸七比一畀德國隊啦。」張翁話︰「講呢啲，食魚喇。」係囉，你唔好話美國隊捧盃。「點解呀？」因為美國勁囉，你睇拜登最近紅光滿面，就知道人家行緊運啦。
都係食魚，無你咁好氣，今次歐洲隊得唔得？「成個歐洲運程差少少，你知這個冬天會好冷，歐洲人心事重重，無油無能源，個運唔就佢哋。」我心諗，就係哀兵上陣，先至可能谷起把火，踢出超班成績，捧走大力神盃沖沖喜。當然，我費事窒到大師兄咁應啦，都係食埋個魚頭，幾盞呀，杉斑肉質確係細緻。
「好啦，不如大家睇下時間夾唔夾，去台灣玩，日日食下牛肉麵好唔好？」睇下點，不過，我又想去新加坡，因為當地咖喱蟹好好味。
