李辰安 - 新春歎普洱茶|辰來之筆

年又過年,今日年初三,為了人生更加精采,大家提早去茶樓,飲杯好茶吹吹水,不亦樂乎!
聽女同事講,即係成日都去日本,當返鄉下嗰個OL,佢話日本好熱鬧。「講呢啲?」大師兄似係唔多Like,至於過年前去完日本之銀行偉,似乎無乜大反應,只係呻一句︰「我早知去泰國,學辰哥話齋,去Lisa姐老竇家食肆打卡。」偉哥,乜你咁好記性,過年前吹下水啫,我點知「一語成籤」?「安仔,你都算講過書,應該係一語成讖,唔好學港仔港女,成日『讀破字膽』(編者按:即讀別字),真係九唔搭八。」
  我都無佢咁好氣,大師兄你最近無去過日本或者韓國,喺邊度谷到成肚氣?「世侄,乜嘢叫做『讀破字膽』?好多都係約定成俗,你話依家香港人求籤多,還是有人識得講解讖緯學?」我靜靜地食蝦餃,不忘上網查一下,讖緯學源於二千幾年前漢朝流行的政治預言,涉嫌有神棍為咗謀朝篡位,一早作定故仔,例如王莽建立新朝就係多得呢種宣傳手法。「辰哥,呢種宣傳工夫,依家都流行,我哋現代人名為認知作戰。」明白,真係可以長見識。食完蝦餃,咪食包包,再飲杯陳年普洱,醒晒。
  「普洱係張翁私家貨,係唔同啲。」聽講過千大元一斤,唔怪得咁好飲。「幾十蚊両啫,都係散茶,唔係原裝茶餅,勝在有啲年份,味道甘甘,又幾滑口。」講到飲茶,我平時最多係用車仔紅茶茶包,都係Office班大姐採購。「你班女同事一定集體飛咗返鄉下,可能會帶包日本玄米茶手信畀你。」你真係又講呢啲,不如講Lisa姐四閨密嚟香港之盛況啦。「大哥,過年前舊聞,呢個話題講到爛啦,何況,在座幾位都係大叔或以上,點知咁多韓流新聞,不過,我睇四閨密表演好似有留力之嫌,好多賣萌扮可愛場面,實實際際之舞蹈神功少見,不過,我無去現場,你估我係城中名人咩,只不過見過網上流傳之視頻,係咁吹下水。」
  大師兄又望住我︰「安仔,幸好在座無韓迷,你鋪話法好惹火。」哦,明白,今時今日唔好講太多韓國事,當然,日本都少啲講,咁有乜話題?「普洱茶原本係平民飲品,一個唔覺意,上世紀八、九十年代,畀台灣人炒到變天價,一餅四八年紅印,幾十萬元,我後生時候行過上環,茶莊擺出嚟賣係二千蚊。」張翁話,上環茶莊都有擺紅印出嚟,但已列明係陳列品。「我聽過人講,紅印炒到二十萬元,依家唔知乜嘢行情,三年大疫,內地同胞或者無咁有實力,唔會又去炒普洱啩。」
  「世侄,二十萬元一餅,你時光倒流幾多年?兩片紅印青餅,拍賣價二百萬元,即一百萬元一餅,疫情過後,內地經濟報復式增長,我諗出年可以去到三百萬元一餅。」張翁,使唔使去到咁盡?百萬元飲一餅茶,有乜特色?「好簡單,有底蘊,味陳化,回味再三,換言之,入口好似焦味,完全無任何清澀味,不過,半分鐘多啲,甘味在你口舌中如泉湧,然後令你久久難忘。」
  一般而言,紅印都未必有此化境,但都開始接近,事關師傅教落,起碼八十年之普洱先至有如此高境界。「我伯爺個伯爺當年係幫襯同昌號,至高級係百年宋聘……」好啦,你講我都唔曉,我有三百萬元返大灣區買豪宅等退休。好啦,今日大家食完又要開工,不如諗下放工之後去邊,飲酒好唔好?


hd