李辰安 - 抗疫奇緣｜辰來之筆
發佈時間：03:00 2023-01-31
好快又到元宵佳節，近日返工聽埋唔少兩地戀愛之真人真事，今日要同大家分享一下。
黃昏酒聚，一切如常，但係大家好似無乜新鮮話題，可能仲未進入狀態，我就有好多感動人心故事，我問大師兄︰「三年不見，依家見面，你會有乜反應？」銀行偉今天衣着好「士嘜」，原來有內地大客過嚟同佢聚舊，發達啦，呢排中港股市都好熱鬧，我問佢︰「有無飲咗好多茅台？」
其實我咁大個仔都係飲過茅台兩三次，次次都係同內地朋友有關，不過，銀行偉識埋好多內地富二、三代及留洋深造之士，好少「隊」茅台咁「草根」，而係識得歎絕世紅酒。「辰哥，三年不見，點會有太大反應？地球人都識用視像會議，話之你去到中國太空站咁遠，大家都可以保持聯絡，你估好似上世紀五十年代時代流行曲《三年》咩？」
「左三年右三年，這一生見面有幾天，橫三年豎三年，還不如不見面。」張翁熟到識背︰「當年我都係聽伯爺播留聲機，呢首歌係李香蘭首本名曲。」我上網一尋，原來係1958年《一夜風流》之插曲，電影改編自俄國名著。「嗱，我就聽過一個『三年』之現代版，某港女生疫前與內地才俊交往，原本約好2020年新春過後，北上見家長……。」大師兄好似唔多耐煩︰「北上武漢見家長呀？有無咁啱呀？」
好啦，話題無端端畀人打斷，飲酒，無你咁好氣，我問老闆有無茅台，其實係新春講笑，點知佢話有，仲係私人珍藏，我馬上轉軚︰「都係飲開葡國有氣白酒，開住一支飲下先。」港女生準備好之時，武漢出事，原本都想博一博，以為無事啫，好彩無夾硬來，疫情急轉直下，如果見家長，可能會一嘗封城巨變。
「係囉，大師兄你又點估到真係原來係武漢？」大家都笑，吹水唔抹嘴，有時會撞到正。「辰哥，不如長話短說，呢位故事女主人翁有乜遭遇？唔通又係好似部電影咁，一夜風流之後，變成單親媽媽？」銀行偉好無耐性，故事並非有人意外造人，而係疫情第二年，雙方由濃轉淡，港女士曾經多次掙扎，話之需要隔離十幾廿日都係想去內地搵佢位男朋友，結果，去得一次，去唔到第二、三次，忽然之間，呢位故事女主角覺得，內地與香港原來係那麼近又是那麼遠，想下又想，香港人究竟可唔可以融入內地生活？尤其是由於疫情關係，令兩人分隔兩地，如此這般，某日遇到讀書時之前男友，故事便曲折地發展。
張翁話，下次可以上去佢Office，有兩支正宗茅台，歡迎大家品嘗。「故事仲未講完，前男友喺英國返到香港，佢話出面世界好Free，好似英國咁，使乜戴口罩，港女士頓時感到大家有共鳴，於是乎自然而然又再一齊拍拖。「安仔，我估下個劇情發展啦，依家故事女主角已經同前男友定居英國，係咪？」
我唔多好意思窒了大師兄一句︰「估得到咁容易就唔係故事啦。」我懶理大家，食件三文魚先。「安仔，唔通佢同前男友去咗上海？」原來港女士與內地男分手之後，跟前男友去咗新加坡，因為男方公司安排，無得留低香港，但聽講雙方仲未結婚，女生家長好勞氣，猛咁催婚。「安仔，嗰位女主角貴庚？」年齡係女人秘密，不過可以畀少少貼士大家，佢係虎年出世，你慢慢估下，我講呢個故事，可以名為「抗疫奇緣話香江」。
