【新App試玩！】 「Photoshop Camera」影相App一鍵即可影出唯美星空及日系人像！逾80款高質濾鏡有排玩！

Adobe出的Photoshop向來都係P圖軟件的始祖，而家佢推出「Adobe Photoshop Camera」影相App更加係將佢世界級P圖效果移至手機（IOS/Android）上面。小編一開始聽到Photoshop都會心諗會唔會好難用，但點知原來只需要撳個掣就可以將啲相變成星空、美顏唔同效果，真係好正！

「Photoshop Camera」App裡面有超過80款不同的濾鏡畀你慢慢玩，由P天空到人像都無問題！小編就以公司附近的地盤景測試，原本只是平平無奇的景色，但經過星空效果，佢將自動偵測到的天空部分秒變星空，效果超像真，令同一個地方變成了超夢幻、好似電影一樣的場景！當然除咗星空濾鏡，仲有好多唔同嘅天空濾鏡可以玩！

至於人像方面，「Photoshop Camera」App一樣有唔少濾鏡可以玩，其中小編就試玩了「Neon Pulse」和「Dappled」，後者「Dappled」可營造樹影陽光效果，將背後普通的背景秒變得像日系雜誌相般唯美！相機濾鏡更不少得美顏效果，毛孔即時不見了，就連頭髮都好像沒有原本那麼毛躁！

而「Neon Pulse」濾鏡小編也超鍾意，可以影出好似TeamLab嗰種點點星光嘅相，喺任何地方都影到真係超輕鬆！而且每款濾鏡更分有不同款式，只要向左掃就可以轉換下一個款式。

最後玩完濾鏡唔好以為就咁完，你仲可以再細緻調節照片的光暗、對比、陰影，調到張相啱晒你心水為止！只能說呢個「Photoshop Camera」App功能太強大！