電競喇叭｜Panasonic掛頸式 睇戲360度包圍 電競亞洲冠軍：Online對話消噪勁

近年電競運動成為不少人談論的話題，香港也孕育不少出色的電競選手，並為港爭光奪得多個獎項，令人對打機無益的傳統印象逐漸改觀。

 

而市面上有關電競的產品也如雨後春筍，種類亦愈見繁多，不單只一般的電競桌、椅、顯示器及滑鼠等，當中有電競用品品牌Razer更因應疫情，特別推出電競專用的口罩，過濾功能達到N95級，而且口罩中間位置設有窗口位，可讓外界看到用家口型，兩側更設有燈光效果，早月推出時便立即售罄，打機，其實也十分著重防疫衛生。

 

而Panasonic早前也為電競選手推出專用喇叭，採用掛頸式設計，內置有四個發聲單元，加上True MAGESS音效，不再緊罩雙耳之餘，更可聽到遊戲中不同方位的聲音。

 

廠方表示這款掛頸電競喇叭，是與FINAL FANTASY的開發團隊SQUARE ENIX合作開發，特別適合用於RPG（Role Playing Game）、FPS（First Person Shooter）及冒險遊戲。

 

為測試這款掛頸電競喇叭，找來曾奪得《皇室戰爭》的亞洲冠軍何浩楠 (Aaron)，看看表現如何。「玩完一舖之後，其實個投入感都幾高，完全唔可以同其他百零元喇叭相比，完全係超水準，呢個喇叭畀我既感覺係較為自然，我比較少用掛耳式喇叭，掛耳式耳機就用得多，暫時黎講，今次呢個電競喇叭，畀我既感覺比較自然，唔會有夾硬的感覺，因為電競音樂與平時聽歌不同，電競的音效聲會比較嘈吵，呢個喇叭都做得比較足。」

 

過往主要使用耳罩式耳筒既Aaron，對於採用掛頸式設計的電競喇叭，評價不錯。「戴住個頭套式耳機，幾䟴耳，個人會好辛苦，所以依家出咗呢款喇叭，我覺得係方便左好多實況主，完全唔使笠住個頭，戴起上嚟真係好辛苦，尤其戴超過兩個鐘，隻耳仔就會紅鬼晒。」

 

不過，Aaron對喇叭的收音表現則有點擔心，「不過我都有少少擔心，用呢個喇叭會撞咪，因為頭戴式耳機係笠住個頭，唔會收到你耳機既音樂，呢個就唔同，如果支咪就係隔離，或者傾緊電話，就絕對會收到音。」為消除Aaron的擔心，筆者與Aaron進行網上對話，期間Aaron一面進行遊戲及播放音樂，結果是Aaron在進行遊戲及播放音樂時，身處房外的筆者，幾乎完全聽不到任何雜音，並能與Aaron清晰地進行交談，可見其消噪功能十分出色。

 

雖然收音表現也合格，但Aaron似乎競喇叭仍有點不滿，「其實打機好多時候都會用右手，如果要用右手較大細聲，我覺得掉返轉會好好多。」原來如此，但Aaron對電競新產品有何看法？「如果俾我揀，我一定係戴呢種，因為頭先我都講過，大耳筒戴兩個鐘就會好攰，除此之外，戴耳筒最大分別係，喇叭的私隱度可能會較低，但係你可以聽到外面發生咩事。」

 

其實Panasonic這款掛頸喇叭，不但只限於電競用，還預設有music及cinema模式，「因為平時耳筒會塞住對耳仔，塞得耐都會唔舒服，但係呢個掛係條頸度好舒服，而且啲聲360度圍住我轉，好有睇戲既感覺。」另一試用者WingYee表示。

 

而另一試用者吉吉則稱：「頭先我就睇左套電影，覺得其實音色無入耳式或headset咁好，可能限於尺寸問題，低音的確麻麻地，好似長期都有兩個電腦喇叭播緊既效果，不過有一樣野好好，就係個環迴效果做得好好，例如飛機由左至右飛過，真係聽到個路線，呢個我覺得幾好。可能佢本身定位係電競選手用，音色方面未去到HIFI級數，優點係幾新穎既設計，如果加入按摩功能就真係會大賣，如果做到無線既話，相信都係一個我會買既條件。」