• 2022年5月16日 星期一
  • 21º
  • 81%
  • facebook
  • Weibo
  • RSS

李辰安 - 上海灘Vs.胡志明市|辰來之筆

時下最熱門話題,就係離開上海。爸爸我們去哪?梗係去越南啦,仲使問嘅?點解呀?坐低飲杯茶、食個包先話你知。
  銀行偉話上海抗疫唔係好順利,外國投資者投訴呢樣又投訴嗰樣,好多人揚言要離開上海灘。張翁見慣國際風雲,真係坐低食個包先同你講,我就好奇問大師兄︰「洋人捨上海而去,會唔會選擇嚟香港,你知啦,香港始終無封城,而且好似好近西方抗疫想法,係咪?」張翁飲完杯茶,同大家上一課︰「香港無乜Concept好玩啦,全世界都會走去越南。」
  原來越南抗疫成功,當地製造業出口近月大升,已經勁過深圳,就嚟成個廣東省都唔夠佢揮,所以離開上海,下一站係越南。大師兄話︰「如果疫情減退,最想去首選胡志明市,因為此乃東方巴黎。」乜唔係上海先至係東方巴黎咩?「安仔,胡志明市先至正宗,因為以前係法國殖民地,食個包都唔同啦,上海只不過係一個西洋大雜薈,乜都有啲,又乜都唔係。」銀行偉話,佢班洋人同行朋友,早十年八年前,最興攞幾日假去胡志明市歎幾日,因使費便宜,酒店又靚,法國餐味道正宗。「辰哥,嗰陣時好多洋人都開始唔Like上海,一來物價高,二來太過虛榮,去上海度假總有一些不愉快經驗。」
  張翁話︰「上海人係有天生之優越感,此起香港人有過之而無不及,佢哋上年紀嗰班人好厲害,八十、九十歲落街買棵葱都執到正一正,全部都係許文強、丁力嗰隻西裝加大褸、大頸巾Feel。」係呀,上海人去做核酸檢測都有人着到嘉年華會咁七彩,令人大開眼界。
  「相反你睇廣州人排隊做核酸檢測,就係非常接地氣,男士多數係短褲、背心加拖鞋,身家過億同幾十億都係同街坊一樣。」大師兄,廣州都曾經華洋雜處,點解我哋同上海差咁遠?講下講下,不如叫嘢食先啦,今日不如試個生炒骨,醒下胃最實際。然後呢?「可以食個豉椒牛肉兩面黃煎米粉,咁就冇咁熱氣。」我就提議不如涼瓜牛肉更正氣,好啦好啦,不如叫幾籠點心先。
  張翁係廣州經商世家,佢由細到大見慣世叔伯之平實作風。「我細個睇伯爺同行家戰前、戰時去南洋經商之照片,佢哋着得好古怪。」點古怪?「我見有位阿叔,肥肥地戴個粗黑框眼鏡,佢負責去到越南訂大米糧食,標準服裝係着條短褲、打條呔,隆重少少就加件西裝。」咦,想像下都幾新潮,係嘞,當年廣東商人好多都係去越南,因為當地乃魚米之鄉,戰時香港要食米冇咗越南就好弊。
  「廣東人唔會好似上海人咁洋化,但我都唔係嗰個年代之人,所以唔知點解,着西裝加短褲主要係方便舒服,你估去頒獎禮咩。」
  當年越南好多華人商賈,同內地有幾多生意關係,所以好多人發大達,有錢到你唔信,點知道第二次世界大戰之後,越南變天,好多有錢華僑於上世紀六十年代,拋棄所有家財,真係淨得一身短褲和拖鞋,身懷十幾廿両金就走難嚟香港,由萬幾呎別墅,屈就住旺角、深水埗之板間房,仲要係一家幾口逼埋一齊。
  「風水輪流轉嘞,依家越南點止係魚米之鄉,已經成為第二大世界工廠,發到巴巴聲,好多人話,隨時可以取代中國而為之。」銀行偉你真你九唔搭八,越南又點可以食得落中國咁大嘅工廠?「偉哥係銀行投資界,最緊要係有Concept,有Concept就可炒得起,升到離天百丈遠,大家割完韭菜,就話之你。」張翁話,越南人口有限,地方有限,資源亦相當有限,加上幾十年來發展曲折,事關唔似日本、韓國有美國扶持,又無中國咁大資源同能量,所以最多都係做世界第二大工廠,如是者,亦不過係幫外資外企打工而已,想要有高科技就要等貴人幫手,但邊個會做佢貴人?
  「係嘞,依家入去越南幫手搞房地產就有好多人,因為越南Concept當時得令,唔使講第一件事就係馬上見到商住工業等地價齊升。」張翁話︰「邊個入去幫越南建設現代工業,嗰個先至係老友記,其他都係入嚟搵銀之街外朋友。」
  講開又講,上海灘始終係有實力,依家係電動車產業中心,洋人話撤出上海,好呀,大家越南見啦!
 


hd