任睇No.1
  • 31º
  • 65%
  • 2022年9月27日 星期二

李辰安 - 點解係李奇唔係修哥?|辰來之筆

  周不時上網見到有心人上載舊相,緬懷昔日香江情,我都喜歡收藏,例如上世紀六十年代之「李奇」與「程寶珠」拍拖照。
  大師兄係粵語長片影迷,見到我與大家分享咁多懷舊照,好開心又好贊成,因為能夠拾回一點集體回憶,令大家更加珍惜和愛護我哋嘅香港。「辰哥,使唔使去到咁高層次,香港人人愛,因為呢度係自由港。」今日又係一身無牽掛嚟到中環小酒館,四友相聚,聽見銀行偉對我之Challenge,我覺得有同大家講幾句之必要。
  「偉哥,你唔知我身邊有幾多朋友、同學、親戚移居或移民,大家喺香港一齊成長,忽然發現佢哋好似再無對香港有半點留戀,所以有感而發啫。」我其實想講,好彩老友移民/移居唔使做人情,唔係就會失預算。「世侄,上世紀六十年代,李奇(羅嘉良主演電視版《難兄難弟》角色名稱,其模仿對象正是上世紀六十年代小生呂奇/圖右/黑白圖片)同寶珠拍拖年代,有人一家大細移民,真係會擺番幾圍,請大家食餐餞別飯,送禮人情不可少。」
  今日飲乜好?都係啤酒,清除悶氣,精神呀!「嗰陣時去美國攞綠卡好威水,一是有女嫁去美國落地,申請父母、兄弟、姊妹過去享受全世界最自由民主又有錢之生活。二是有個好叻嘅仔,可以喺美國搵到高職,入籍之後,就輪到家人啦,你話幾稀有之人生快樂事。」張翁就唔會羨慕人家去美國,事關香港有大把生意等佢做,邊得閒去美國住,佢老人家話齋,去美國、加拿大做乜?夜晚想食碗雲吞麵都無,星期日又無咁方便,飲完茶去遊船河,黃昏靠岸食海鮮。
  「辰哥,你話香港歷年都有影迷情人,點解李奇同寶珠,硬係佔到榜首席位,幾十年都咁長青。」銀行偉一杯啤酒灌入肚,好似同人鬥快咁,做乜咁心急,趕住走?今晚大家約定食飯呀。
  「啤酒梗係大啖飲啦,你估依家燭光晚餐,呷香檳咁斯文咩。」係,你啱,想起燭光晚餐,呢一個可謂香港老派電影之經典場景,不過,我醒唔起李奇有無同程小姐慢慢呷香檳。「世侄,提提你,兩位戲迷情人好多時係去雍雅山房飲咖啡。」係噃,修哥同芳芳都不時去嗰度,大家有無記憶?「係嘞,李奇同程小姐點解咁深入民心?志明同乜嬌、船頭尺同十三妹,點解唔夠揮?」張翁以世伯身分同大家解釋︰「因為李奇聲綫獨特,人又斯文淡定,一睇就知係好人,加上有程寶珠之神奇化學作用,所以打造了這一對戲迷情人之經典。」
  我慢慢一口一口的品嘗呢杯大啤酒,心裏想,修哥唔斯文咩?修哥亦一派正人君子,點解佢同四哥先至係天生一對之經典,而唔係同芳芳揮低李奇、寶珠嘅?唔通「李奇腔」係殺手鐧。大師兄話︰「李奇係港男元祖,你睇佢兩邊修長之鬢髮,好多人想學都學唔嚟,幾有魅力呢。」一位家輝,另一位嘉良都扮過李奇,講老實,兩位都可以攞到好高分,但只能扮到喜劇版,即係擺明係聊博一粲咁,唔會得到滿分。
  銀行偉飲完兩杯大啤酒,思路依然清晰,佢問一個好問題︰「如果有人好均真想扮李奇,你估效果變成點?」張翁拍手大讚偉哥有角度︰「你以為可以百分百復刻李奇,你就變成百分百笑話,邊有人可以跟得上真人版李奇呢!」對,原來講下講下,大家先至發覺李奇之成功在於佢真人其實好誇張,誇張到再走半步就變成惹人發笑之人物,但好一個李奇,就是在懸崖邊有一綫之力,把呢種氣質保留在浪漫和大情人之境界,其他人點可以有李奇之天生駕馭能力?所以扮李奇一定只有喜劇版,你想復刻標準李奇,等於同自己開玩笑,同埋跟觀眾開玩笑。
  「咁,程寶珠又點解咁襯李奇?有乜化學作用。」呢一個問題,都係交畀德高望重之張翁作答。「等我飲完杯啤酒,先至同大家分享一下個人意見。」大家於是舉杯,互祝生活快樂。「其實程寶珠係好香港女性代表,佢扮女俠固然一流,但係你唔好忘記,程小姐代表作是演工廠妹,呢一個代表香港女權上升象徵,又係香港人驕傲之角色,看似無光環,其實係有一個好大之光環。有此能量之好戲之人,作風又不浮誇,一拍落去如夢如幻之李奇,咪有化學作用囉。」
  好啦,大家肚餓,準備食飯啦。


hd