【聖誕好去處2020】盤點各區聖誕商場特色佈置 留港都可以有歐遊感覺

Previous Next

臨近十二月份，一家人準備迎接聖誕節長假期，無得去旅行嘅情況下唯有留港消費。本地唔少大型商場都有聖誕活動，有唔少聖誕佈置畀香港人打卡影相，止一止旅行癮之餘，唔少地方嘅聖誕佈置都設計得非常靚！

一、The LOHAS九米高聖誕樹 一家大細打卡之選

位於日出康城嘅The LOHAS，聖誕前夕就佈置咗一個九米高嘅巨型聖誕樹，而且仲有一個充滿聖誕氣氛嘅小庭院。庭院入面，有聖誕老人辦公室，可以畀小朋友透過玻璃窗，睇下聖誕老人係點準備禮物同回覆小朋友信件。如果小朋友問起聖誕老人嘅故事，家長不妨帶佢地去康城睇下，就唔需要諗到頭都大啦！

另外，11月26日仲會有全港最大間嘅NAMCO喺康城開幕，可以睇聖誕佈置之餘，亦不失為一個小朋友遊樂嘅好去處。

二、青衣城互動光樂裝置 情侶打卡一流

如果擔心室內人多擠逼，青衣城嘅聖誕佈置都值得一去，有本地初創企業設計嘅互動光樂裝置，名為「聽風的森林」。「聽風的森林」由110組風動光樂裝置組成，每組裝置都有唔同嘅聲效同燈光，每當有風吹過都會發出風鈴聲，感覺就好似置身於掛滿風鈴嘅森林入面，而且仲有光效，啱晒情侶打卡！

三、1881活化古蹟變歐陸古國 彷如身處冰島小鎮

除咗康城同青衣城，位於尖沙咀廣東道嘅1881前身係水警總部舊址，經過翻新同增添聖誕佈置之後，廣場位置有8米高嘅聖誕樹同5米高巨型北極熊公仔，配合聖誕燈飾，令到整個廣場好似異國小鎮一樣。而且舊水警總部嘅建築物，本身都係以英式設計建造，配合聖誕氣氛，非常有冬天歐遊嘅感覺，畀人止一止旅行癮之餘仲可以影相打卡，非常適合一家大細同情侶。

四、中環ifc商場 用AR程式創造屬於自己的聖誕小鎮

聖誕佈置固然非常吸引，如果再結合AR擴增實境技術，就可以令到簡單嘅佈置變得生動。中環ifc商場就為聖誕節推出特別活動，訪客可以用AR技術創造自己嘅聖誕小鎮，透過手機將ifc變成自己設計嘅模樣，仲可以錄成短片轉發畀朋友。咁就唔怕同其他人撞背景，完全獨享屬於自己嘅聖誕佈置啦！