48歲林子博去年一波多折，4月時太太董燕君（Shirley）確診患上罕見的平滑肌肉瘤（腹腔）第四期，需要錢時卻被TVB請食「無情雞」，冇得撈兼要籌錢醫病，好徬徨，幸得古天樂等圈中人伸手援助度過經濟難關。不過禍不單行，子博年尾又喺紅隧炒電單車，好彩只係損手爛腳，唔夠部車傷得重！咬緊牙關陪伴愛妻打咗大半年硬仗，2020年頭終於報喜，子博說：「經過中西合璧及其他治療，太太最新嘅檢查報告顯示原發性腹腔腫瘤及擴散開去嘅肝同腎腫瘤同樣縮細咗2cm，最重要活躍程度降低咗，進展良好，總算鬆一口氣。」採訪：方騫平 攝影：李維隆