溫碧霞（Irene）在巴黎完成首部法國電影《Happy Night》（暫名）拍攝工作後，繼續留下來出席巴黎時裝周。巴黎時間昨日她應品牌邀請欣賞秋冬騷，Irene選擇了淡粉紅Deep V吊帶紗裙睇騷，雖然初春的巴黎氣溫仍然寒冷，幸好時裝騷在陽光充沛的下午時份舉行，氣溫和暖，再配上棗紅長身皮褸，穿著恰到好處。

Irene已連續多年獲不同品牌邀請出席巴黎時裝周，今季感受特別深：「以前都會遇見好多香港及內地明星朋友，但今次因為疫情影響，到依家為止我仲未遇到香港朋友，內地藝人因為疫情不准入境，外國藝人就有好多，大部份都係來自東南亞、韓國、日本、美國、英國，所以都好熱鬧，只係冇晒熟口熟臉的朋友，希望集結大家念力，疫情快啲過去，大家生活回復正常，人人都有工開啦。」Irene並指，巴黎政府認為有病才需要戴口罩，大家都好自律，拍電影及時裝周都沒有人戴口罩，甚至好難才找到口罩買。