中電這鐵股，上月二十三日，竟突然被大量恐慌性拋售，跌到落六十五元。
最近的股市，受疫情影響，簡直癲癲哋，散戶連實力大藍籌都在慌張心態下亂沽，清醒智慧投資者當然趁機有咁多掃咁多，結果「亂跌」的實力股好快升回正常價。
最佳例子是中電這鐵股，上月二十三日，竟突然被大量恐慌性拋售，跌到落六十五元。喂喂，其實過去三個月，疫情壞消息天天有，一直，中電都企在八十元以上。事實上，三月十二日仍高企在八十二元水平！
資深投資者，一睇就知二十三日的中電股價，是「倒水連BB倒埋」的現象，這正是千載難逢掃貨時機！當日有入貨者，短短半個月已笑到見牙唔見眼矣。這個正是股市為乜令人「神魂顛倒」之因，太吸引了！
講起股市冇理性，本周二又有一宗非常無厘頭的。話說高銀金融周一晚宣布，二○一八年十一月投得的啟德4B區4號地皮，已接受第三方出價認購，並正就合規事宜進行諮詢工作。這消息，就小弟看來，百分百負面，因等於高銀急需現金周轉而「割肉」！點知，哈，個市真係儍儍哋，受這個出售地皮消息刺激，高銀金融股價周二竟一度抽升百分之三十四！哈哈哈，邊個咁豬頭呢？高位出到貨者，真係笑失聲矣。
結果，尾市股價回順，只升百分之十點六。執筆此刻（周四），升幅已全部蒸發，回歸正常矣。
講起高銀金融及其大股東潘蘇通，真是大起大落。十年前旺到可以「點石成金」，更威盡馬場，買馬幾乎不問價，匹匹千萬元冇問題，因在地產方面豬籠入水也！
意氣風發之下，在何文田掃入兩塊天價地皮，位於常盛街口及港鐵站上蓋。
點知……去年開始地產市道急瀉，再加上港鐵站發生沉降停工，簡直頭頭碰着黑，急需現金周轉而賣地皮，正常。
問題在，邊個儍仔以此為好消息去掃股票？（曾智華）
全文刊於《星島日報》「阿碌開咪」專欄
