食環署宣傳大使清潔龍阿德不時都會在Facebook「抽水」，相當受網民歡迎。而阿德昨日就突然貼出一張性感泳裝少女相，更附上挑逗字句，「我叫Aedes albopictus伊伊」、「要約直接見面嗎？」震驚大批網民，以為阿德專頁被「hack」。不過再按入連結，才發現原來是登革熱白紋伊蚊的資訊，令人一秒失笑，獲網民激讚最佳PR。

昨日網民都被阿德的帖文大嚇一跳，只見「伊伊」穿著可愛泳裝，輕咬太陽眼鏡框，引人遐想。帖文附上一條連結，不過就無人敢按入去，皆因帖文還有一段文字：「您好，我叫Aedes albopictus伊伊，我住在一個草地旁邊。 要約直接見面嗎？輕輕咬你耳朵，莎朗嘿喲，快看我的調皮視頻」，十足成人電影宣傳。鬼馬阿德最後揭開謎底，原來內文是登革熱資訊，而Aedes albopictus就是白紋伊蚊的學名，網民才恍然大悟，大讚「靚抽」。

不過帖文似乎「玩大咗」，阿德今日再發文指，帖文已經被Facebook用「違反裸露或性行為規定」移除，變成真「滅蚊」，「係咪有人Report我啊？張相只係我為咗出 Post上網買嘅一張模特兒相，而模特兒係著住泳衣㗎，點解會係『裸露及色情』呀？冤枉啊，我都係想提大家要預防蚊患啫！」

網民都哭笑不得，有人提醒阿德可能是被人舉報，「係咪有人以為你真係中毒report 你」、「埋沒創意，一個sad day」，不過亦抽水讚宣傳成功，「ig都支持『滅蚊』」。