鑑於新城知訊台執行總監程凱欣初步確診、香港首位確診藝人施匡翹也定期到新城開咪，為安全起見，新城隨即安排全體員工做深喉檢測。今日范振鋒出咗檢測報告係陰性，他表示周六同思敏會如常返電台開咪做《開心大派對》節目，問到驚唔驚時？他坦言都會心慌慌：「但為咗搵食，冇辦法，除咗戴口罩、搓手液、消毒噴霧、換咪套外，仲會戴埋帽同手套囉。」由於家燕姐未有檢測報告，當日她會做phone-in。

 

DJ思敏溫婷婷報告呈陰性

今日DJ思敏在社台平台報喜，並手持鮮艷色彩的凍飲坐在吊床上，充滿夏日感覺宣布：「報個喜，報告出咗，呈陰性negative。雖然係咁，呢幾日都唔會周圍走，喺(屋企)都做好防禦消毒，繼續homworkout。」又hastag指屋企的糧食都夠撐幾日。

 

新城DJ溫婷婷於社交網上報喜，指深喉檢測報告呈陰性，並且在等候報告期間，有乖乖的留在家中，下一步是等候公司工作安排的進一步通知：「好感動，亦都非常多謝你哋嘅關心我身體狀況暫時冇事，而且我今日本身放假，所以都乖乖哋留咗喺屋企，大家唔需要擔心。公司除咗進行大型消毒之外，亦都安排咗每位同事做深喉測試，我今日會喺屋企等候結果。之後返工同節目嘅安排都會等公司進一步通知。大家都要好好保重身體，呢次病毒擴散得好快，冇特別事都唔好出街，最重要係保持樂觀心態去面對先可以推過呢場仗，因為往後可能仲有好多場仗要打，留返條命仔先可以做到更多嘢，追想追嘅夢。＃犧牲色相素顏登場#btw我真係好鍾意香港＃大家都加油。」