黎瑞恩（小恩子）日前喺社交網站上載爛面相，自爆7月23日開Live後不久，「生蛇生上眼」，條蛇搞咗她成個月，病情反覆，又癢又腫又痛，仲生晒水泡，苦不堪言，幸而病情經已向好。不過，有政見唔同嘅網民乘機發炮，甚至向她惡意攻擊及詛咒。

 

對於有網民喺「傷口灑鹽」，47歲小恩子原來仲好好火，被辣㷫的她噚晚喺社交網站發文還擊：「嘩嘩嘩，睇到一班人充滿仇恨、滿口惡言、心腸歹毒、講嚟講去三幅被嘅留言，真係唔好意思呀！我真係笑咗囉！我只係生蛇啫，我仲未死，咁快就開心到咁？不過唔緊要啦！發洩吓都好嘅，做人最緊要開心，你哋嘅祝福，上天一定睇到嘅。#唔想罵戰#承唔到你哋貴言#非常難過」唔少粉絲留言力撐安慰她，叫她要多休息，小心身體，不要動氣，時運高睇唔到、左耳入右耳出、不遭人妒是庸才…