本地男團Mirror成員姜濤離港個多月到台灣拍攝電視劇《超感應學院》，今日越洋收到粉絲團給他的驚喜，一口氣安排了3部應援車為偶像及劇組打氣！

今次是姜濤第一次離開香港工作，所以第一眼看到3部掛有自己樣貌Banner、人型紙牌的應援車出現劇組現場，姜濤非常之驚喜。「真係無諗大家會用依個形式，好多謝姜糖們；之前疫情關係，會見少咗Fans，但都係同一地方，今次去到台灣分隔兩地，真係好唔同，真係好掛住大家，好想快啲拍完返嚟，自己亦會努力，今次套劇唔會令大家失望。」姜濤更逐一參觀應援車，當中一輛是有齊台灣手沖茶、珍珠奶茶的飲品車，及一輛是姜濤最愛即整漢堡包餐車，另一輛是供應劇組午餐包括有意粉的餐車。