今年剛轉投新公司嘅謝文欣(Ally)頻頻曝光，年頭就憑一首《偶像傳奇》已經先拔頭籌得到「優秀選金曲獎」，仲時不時拍片強攻YouTube，因而同Mirror成員Anson Kong傳出緋聞，相隔無耐再邀請伍樂城班底度身打造新歌《不痛不快》，唱盡少女心事。

 

新歌MV邀得Viu劇《教束》靚仔會長唐浩然（Jacky)擔任男主角，Ally同導演更大讚佢嘅氣質同形象好適合MV氛圍，而且非常專業，Jacky為求有更好嘅視覺效果，自己設計一連串動作同走位，令到件事更有感覺亦流暢，拍攝非常順利。

 

Ally表示當中有一幕最難忘場景，係喺郊外拍浸浴shot，佢仲獻出第一次係咁多人面前浸浴，笑言「好彩有着衫」。雖然天公造美，但由於烈日當空下拍攝，Ally不敵猛烈太陽，搽咗防曬都令皮膚明顯變深，手臂位仲曬傷紅曬，幾日之後就開始甩皮，為咗最靚嘅效果，已經付出唔少代價。