ig女神倪晨曦（Elva）今年初在夏威夷舉行完婚禮及宣誓後，一直想將證婚儀式留在香港擺酒兼舉行，但受疫情影響，計劃趕不上預期，BB急不及待出現，於是決定在BB出世前先完成證婚儀式，所以今日（19/9）在文華酒店舉行，正式與V先生拉埋天窗。

證婚儀式只邀請了男方家人及Elva的幾位好姐妹如朱韻韻、鍾浠文、簡幗儀、苟芸慧及經理人Ula等出席。Elva表示：「一直不斷改期想我啲屋企人可以嚟到香港出席，由2月改來9月都想睇下有冇機會疫情過去，可惜未有轉機；我和V先生想在BB出世前完成證婚，所以今次我啲屋企人也未能從加拿大回來參與。」

Elva把在夏威夷舉行婚禮的靚相跟大家分享，她說：「當初計劃1月在夏威夷舉行完婚禮，明年1月就在香港擺酒；依家先同大家分享在夏威夷嘅喜悅，希望疫情快啲過去，依家大家最緊要身體健康。」很多人都關心BB的狀況，Elva笑言：「BB好活躍，經常腳伸伸，我每日都會同佢傾下偈，V先生對我哋兩個都好照顧，暫時未偏心，唔知BB出世後會唔會呢！」