明日中秋佳節，少不了一家人食月餅應節。月餅款式日新月異，但月餅撈飯你又試過未？有港爸就因為一時大懵，將女兒自製放在雪櫃的冰皮月餅，當成隔夜飯，直接放入電飯煲煮，結果一家人今年食了一餐一世難忘的「冰皮月餅飯」。

有網民在「Day Day Explode 日日爆」Facebook專頁投稿，指家中習慣將隔夜飯留下，煮飯時加熱一齊食，而平時都是爸爸負責煮飯。結果一日開飯，大家卻覺得一碗飯「甜到漏」，再看雪櫃，居然還有一碗隔夜飯。原來妹妹學做冰皮月餅迎中秋，將餅皮放入雪櫃冷藏，結果爸爸一時「眼殘」，「驟眼睇一大碗白色以為係隔夜飯，順手放入電飯煲翻熱」。

妹妹花很多心機整的餅皮全部報銷，「佢嬲到傻咗，大鬧老竇點解咁大分別都睇唔到 」，但已無補於事，父親只回了一句，「點知你啫」便了事。結果網民和妹妹唯有煮麵食，爸爸出街食，只有不願浪費食物的媽媽食清剩飯。「最後我考慮緊以後都係唔好俾老豆煲飯......或者以後唔好食隔夜飯......」

帖文笑爆一眾網民，「笑到標眼水」、「一句『點知你啫』聽到人著晒」、「我建議樓主關心下令尊嘅視力狀況，會唔會係有老花唔肯戴眼鏡呀」、「不如考慮加啲芒果同椰汁扮芒果糯米飯」，而有網民的爸爸媽媽更誇張，「我媽試過將塊綠色洗鑊嘅百潔布同啲菜一齊炒」、「我老豆將我珍藏嘅Parma ham攞咗去當金華火腿用嚟滾湯」。