昨日是國慶兼中秋，雙喜臨門的日子，各個政黨為與市民慶祝佳節都花了不少心思。當中最吸睛就係新民黨主席葉劉淑儀的百變旗袍相，她足足換了四套旗袍，又在相片旁邊加上慶祝中秋的字句，包括「祝花好月圓」、「但願人長久」、「千里共嬋娟」等，其中一張相仲拎住個月餅，問網民「你食咗月餅未？」另一邊廂，民建聯葛珮帆都唔執輸，她傳了一張中秋賀圖畀盧駿，入面化身成天上的嫦娥，抱住玉兔，祝大家國慶中秋快樂。

另外亦有不少議員選擇擺街站跟市民同慶，好似經民聯梁美芬昨早去完國慶酒會就立即落區見紅磡街坊。民建聯主席李慧琼亦聯同顏汶羽等人落區，同街坊一齊為國家生日寫上心意和祝福。黨友張國鈞帶領的「港島鈞團」三位才子，社區幹事劉天正、陳凱榮同張偉楠就專程去立法會，搵一眾民記議員挑戰猜燈謎。其中三子以謎面「三張紙，猜一字」考起柯創盛，他們即提示道：「紙就一頁頁、三頁紙。」柯創盛諗咗陣就答到謎底係「順」字，仲祝願國家同大家都順風順水。

不過最實用都係工聯會麥美娟的四格漫畫，分享中秋防疫小貼士，醒咗四招畀網民，分別係避免人群聚集，賞月記得保持社交距離；要洗手先好吃月餅；與家人朋友聚餐盡量使用公筷；仲叫大家回收月餅盒或留起用作擺放防疫物資，唔好做大嘥鬼啊！

維港會