香港人生活經常匆匆忙忙，搭車唔小心畀多咗或畀少咗錢都好常見。不過，最近有的士乘客竟將千元紙幣誤當百元紙幣畀咗的哥，而該名好心的哥則急忙在網上尋人，希望將收多的錢還給這名「慷慨」乘客！

有自稱的士司機的網民早前在社交媒體Facebook上發文，指自己開完工回到家點算收獲時，竟在一堆100元紙幣中發現一張1,000元紙幣。他相信是有冒失的乘客不小心畀錯錢，於是他立刻在網上「打鑼打鼓」，希望尋回這名乘客，「如果尋晚坐車比錯1000當100洗，可PM我講返上車落車時間同埋確實地點」，更指會「無條件交還900（元）」。而且這名的哥更相當醒目，表示「唔好打算博大霧，我記得大約咩時段做過咩客」。

不少網民見狀，都紛紛表示這名的哥好抵讚，「你呢啲係叫正常同應受到尊重嘅的士司機」、「欣賞你，而家冇乜咁誠實，唔怕麻煩嘅人啦」、「良心的士司機」。另外，亦有網民分享，自己都曾試過將千元紙幣誤當百元紙幣畀咗的哥，亦遇到好心的哥主動還錢，「咁啱嗰次我去咗一間寵物診所，真係有好心嘅的士司機專登揸返轉頭去診所搵我畀返錢我」。