國泰航空去年十月大裁員，又停運旗下港龍航空，計劃做空姐做一世嘅Ivy喺嗰日夢碎，但佢無放棄自己，轉去追求另一夢想，成為高級意大利餐廳經理，佢話希望學有所用，將機艙嘅服務經驗「由天空帶到地面」，做個貼地嘅服務業人員。

Ivy之前係港龍頭等艙務長，佢話估唔到咁大家公司停運，去年十月得知消息嗰陣，忍唔住喊咗。佢話，十五歲嗰陣夢想成為空姐，二○一三年大學畢業加入港龍，服務咗七年，打算做空姐做一世，諗唔到有一日夢碎。

失業兩個月，Ivy投過五十份簡歷，試過轉行同搵工嘅艱辛，慶幸有屋企人支持，無經濟負擔。直至十二月，喺朋友介紹下，佢入職高級意大利餐廳Crit Room，轉身變做餐廳經理兼宣傳大使。Ivy話，做空姐嗰陣學到嘅，如體貼嘅服務、對咖啡、紅酒嘅認識等，可以喺餐廳大派用場。仲有食客讚過，一睇就知佢以前做過空姐，令佢深信，將機艙嘅服務經驗「由天空帶到地面」係得嘅。被問到如果日後有機會，會唔會再做空姐，佢笑住話，其實只要學有所用，做邊行都得。