音樂串流平台JOOX公佈「聽推介2021年中榜」，張敬軒憑《俏郎君》及《Sweet Escape》分奪第2位及第15位，威到震；至於林家謙、陳柏宇與Serrini、鄭融、Dear Jane、林欣彤、胡鴻鈞、薛凱琪等皆榜上有名。軒仔形容2021是好玩的一年，尤其突襲出新專輯是以往從未嘗試的事情：「今次專輯係成立新嘅唱片公司後首次與新團隊合作嘅成果，想要特別感謝拍攝MV嘅團隊，跟我一齊嘗試以新嘅手法製作，下半年會繼續派歌及有新作品推出。𠵱家更享受製作過程，所以製作進度比以往慢。接住會有機會跟唔同歌手合作，希望大家繼續期待。」睇嚟傳聞中「黎張組合」(同黎明合唱)成事機會好大喎！

林家謙今年再推出一首由他包辦曲、詞、編、監嘅作品《神奇的糊塗魔藥》，並奪「JOOX TOP聽推介2021年中榜」的第3位。林家謙特別感謝歌曲製作團隊；由AGA江海迦親自作曲嘅《CityPop》得到第12位，她表示：「呢首歌由概念到作曲都係新嘗試，自己都好滿意，希望大家能夠感受到獨處中嘅快樂，並讓呢首歌陪伴大家生活。」而胡鴻鈞也表示，得到第9位嘅歌曲《心跳移植》帶點R&B風格，他有份参與創作，對他來說亦是新的嘗試。