獨家丨李佳目標達到歌唱學校報名激增3倍羅啟豪獲Fans示愛恐懼症不藥而癒

《中年好聲音》亞軍李佳及季軍羅啟豪(英國豪)出道僅一個月，生活上已有重大變化，李佳經營的歌唱學校，報名人數激增3倍，有父母專登搵佢重點培育子女做歌星；至於羅啟豪就成功克服患有幾十年的恐懼症，他更剃鬚「重生」，新形象令男、女「豪殼」(Fans暱稱)爭相向他示愛，意外「收穫」令羅啟豪信心返晒嚟。採訪：方騫平攝影：鄧國良

兩人最難忘在街上有唔少觀眾為佢哋打氣，熱情地叫加油。

李佳𠵱家成為TVB歌手有種被肯定嘅歸屬感。

李佳在上海成長，自細睇TVB節目及劇集長大。

李佳及羅啟豪夢想成真。

唱歌對羅啟豪嚟講好新鮮。

羅啟豪打算放幾年時間試吓做歌手。

《中年好聲音》冠軍周吉佩、亞軍李佳及季軍羅啟豪，三人各具實力。

45歲李佳及39歲羅啟豪夢想成真，前者是上海歌手，曾於不少比賽中屢獲佳績，一直希望加入香港樂壇，她開心說：「𠵱家成為TVB歌手有種被肯定嘅歸屬感，能夠圓夢覺得好大件事呀。」羅啟豪感激媽咪劉英經常鼓勵他追夢：「雖然自細想做歌手，但性格太內斂覺得係妄想，社交恐懼症亦會阻擋到我前進，會先打沉自己。好彩今次肯聽阿媽講，參加人生第一個歌唱比賽，否則一定會後悔，阿媽做得好啱。」

李佳獲一家人支持。

英國豪獲媽媽劉英鼓勵參加人生第一次歌唱比賽。

佳佳有好多粉絲。

羅啟豪喺應援物前影相。

自爆報名另有目的

李佳在上海成長，自細睇TVB節目及劇集長大，她覺得TVB好勁，從來冇諗過可以成為一份子，更自爆報名當日另有目的：「報名時我乜都唔知，唯一知道疫情下歌唱學校流失咗唔少學生，如果順利晉身100強就可以上鏡，會幫助提升知名度及收生，而且去見識吓，睇吓TVB係點都開心呀。」她坦言已達成初步目標，仲睇到前景好明朗：「𠵱家多咗觀眾認識，報名人數增添3倍以上，入讀年齡層由5歲至70歲都有，尤其係學生及小朋友，家長都想子女成才。」問到可會乘機調整收費？她大笑說：「每年會有收費調整，但唔會刻意加價，最多會調整私鐘課程。」因為反應熱烈，她已計劃開設一至兩堂的短期班。

李佳最鍾意譚詠麟，以前覺得大紅人「譚校長」係遙不可及。

李佳曾經做過全職媽媽，移居英國時湊住兩名混血兒囝囝。

唔少家長想搵李佳幫手培育子女成才。

李佳目標達到，歌唱學校報名激增3倍。

李佳曾於上環文娛中心劇院開過音樂會，台上跳唱冇難度。

李佳得獎後跟英籍老公Sunny嘴咀，兩公婆感情盡在不言中。

雖然李佳身兼多職，但幾辛苦都唔會缺席兒子的學校活動。

李佳同龍婷互相照顧。

阿媽超強財力應援

李佳有得發圍，跟阿媽同住半山超級豪宅的羅啟豪也有超強財力Backup，所以打算放幾年時間試吓做歌手：「唱歌對我嚟講好新鮮，過幾年撈唔掂再算，直至冇得做先會放棄，暫時阿媽會全力支持。」問到會投資多少錢奉獻呢份夢想工作？他避談：「未諗到(有錢做歌手係咪有優勢？)雖然未必係，但會有安全感，唔擔心會冇飯食，暫時我冇後顧之憂。」不過，他強調為人慳錢貼地，而且繼續freelance做室內設計師，可以自己賺自己使：「父母都想我哋腳踏實地。」

羅啟豪媽咪劉英年輕時都係唱家班。

羅啟豪媽咪劉英係兒子最強後盾。

羅啟豪跟媽咪同住半山豪宅，閒時母親坐喺巨廳上嘅沙發陪佢練歌。

夢想做有實力歌手

羅啟豪的「豪吧」粉絲專頁突破2,100人，仍然單身的他獲唔少「豪殼」示愛：「有女網民話想嫁畀我；男嘅留言話日睇夜睇我啲片...我從來未試過俾咁多人讚，信心漸漸有提升。」講到夢想，李佳最想成為真正嘅歌手，有公司為她出歌及唱片：「細個聽四大天王嘅歌，一定想做最紅嗰啲，直至成長經歷過好多挫折，知道自己要啲乜，但求做到具實力嘅唱將已好開心。」羅啟豪想仰慕嘅音樂人Dick Lee、趙增熹寫歌給他錄成唱片，而他能成為有名氣、唱功被肯定的歌手。